Vendors sa Freedom Park mireklamo

CEBU - Nagpanon ang ubay-ubay nga mga stall holders diha sa Freedom Park ngadto sa Cebu City Hall kagahapong adlawa human masayod nga mopahigayon og demolisyon ang mga sakop sa Market Authority diha sa nahisgutang dapit.

Moabot sa 60 ka mga stalls diha sa Freedom Park ang gitakda untang panggub-on kagahapon tungod sa kapakyas sa mga okupante pagbayad sa ilang obligasyon.

Matud ni City Market Administrator Racquel Bohol-Arce nga sila nakahukom pag-demolish sa apektadong mga vendors tungod sa pipila ka mga hinungdan.

Niingon si Arce nga gawas nga nihunong pagbayad ang mga stall holders sa ilang abangan gihimo na usab kini nga pinuy-anan nga gihulagway nga usa ka kalapasan sa Market Code sa siyudad.

Ang mga stall holders nagpakiluoy ngadto sa mga opisyal sa dakbayan uban sa pagsaad nga motuman sa gipatumang mga lagda.

Hinuon sa pagpakighinabi sa mga vendors ngadto kang acting mayor Michael Rama nahatagan sila og pipila ka mga adlaw nga lugway ang demolisyon.

 Matud ni Arce nga ang katapusan nilang desisyon masayran human unya sa ilang tigom sa Market Authority karong umaabot Biyernes ug bisan unsay mauyonan ilaha kining himuon sa adlaw’ng Lunes.

Tambag sa market administrator ngadto sa apektadong mga vendors nga bayran ang obligasyon niini ug dili na mopuyo sa ilang mga stalls aron dili na mag-atubang og problema.(Elly Bolonos)    (BANAT NEWS)