PGMA misusi sa Hagnaya port

CEBU - Gisusi ni Presidente Gloria Macapagal Arroyo ang P70 milyones nga proyekto sa pagpalawom sa Hagnaya Channel sa barangay Hagnaya, lungsod sa San Remigio kagahapon sa buntag.

Gidayeg sa Pamuno nasud ang maong kalampusan sa maong proyekto nga nakatabang og dako sa mga molabang sa kadagatan taliwala sa Hagnaya ug sa Bantayan Island nga may gidaghanong 160,000 matag tuig.

Ang maong proyekto maoy naghatag og kalampusan usab sa “roro project” sa Pamuno nasud sanglit masayon nalang ang paglabanglabang sa mga barko nga mobiyahe tali sa pantalan sa Hagnaya ug sa lungsod sa Santa Fe sa Bantayan Island.

Natuman ang maong proyekto sa paningkamot ni Kongresista Benhur Salimbangon sa ika-upat nga distrito sa lalawigan kinsa maoy unang mihangyo ngadto sa Presidente sa nasud gumikan sa makapasubo kaayong kasinatian sa maong kadagatan nga kaniadto mabaw ra kaayo.

Gumikan sa kamabaw niini nga may 1.5 lang ka metros ang giladmon,ang mga pasahero nga mosakay sa lantsa, pakanaugon kini inig-abot sa dapit   nga mabaw ug pasakyon nalang og pumpboat lahos ngadto sa Santa Fe gikan sa Hagnaya ug vice versa.

Mahinumdoman nga niadtong 200l may 11 ka tawo nga nangamatay sa maong kadagatan dihang nalunod ang pumpboat nga ilang gisakyan human sila ibalhin gikan sa lantsa nga ilang gisakyan gikan sa pantalan sa Hagnaya paingon ngadto sa pantalan sa Santa Fe.

Gawas sa maong hitabo gisundan pa kini og nagkalainlain pang mga panghitabo nga naghatag og dugang peligro sa kinabuhi sa mga pasahero nga molabang-labang tali sa Hagnaya ug Santa Fe nga maoy nag-aghat sa Pamuno nasud sa paglig-on sa proyektong pagkawot ug pagpalawom sa maong dagat.

Gisugdan sa pagtrabaho ang pagpalawom niadtong Enero 2008 ug natapos kini niadtong Oktobre sa maong tuig.

Sa pagkakaron gipaladman kini og lima ka metros, nga may gilapdong 40 metros ug sa gitas-on o gilay-ong duha ka kilometro nga naghatag og higayong makalahos-lahos na ang mga barko nga motadlas sa kadagatan tali sa Hagnaya ug Santa Fe.

Gawas sa maong proyekto giduaw usab sa Pamuno nasud ang mga proyekto sa karsada sa lungsod sa Medellin ug Daanbantayan nga mga kasikbit nga mga lungsod sa San Remegio nga pulos mga proyektong gipasiugdahan ni Salimbangon. (BANAT NEWS)