CEBU - Lain na usab nga barangay sa dakbayan sa Sugbu ang gipaubos sa kinalit nga drug test sa Cebu City Office for Substance Abuse Prevention (Cosap) kagahapong adlawa ug usa ka kawani ang nasakpang positibo sa shabu.
Dunay 57 ka mga opisyal ug kawani sa barangay T. Padilla nga naglakip sa mga tanod, health worker, garbage collector ug clean and green ang nipailawom sa drug screening test.
Ang barangay kapitan sa T. Padilla nga si Michael Ralota mao mismo ang unang nipaubos sa gipahigayong random drug test.
Matud sa kapitan nga iyang gihangyo ang Cosap nga sila ipaubos sa kinalit nga drug test aron paglimpyo sa iyang mga sakop gikan sa ginadiling drugas.
Ang chairman sa Cosap nga si Felix Jose Lazarte mibutyag nga sa dul-an sa 60 nga nipaubos sa drug screening test usa niini ang nasuta nga tigamitan og shabu.
Ang maong kawani sa barangay nadistino sa clean and green ug gipaabot nga matangtang sa trabaho kung mapamatud-an sa ipahigayong confirmatory test nga drug user.
Matud ni Ralota nga siya dili magduha-duha sa pagtaktak sa maong kawani sa barangay kung makompirmar nga kini adis-adis.
“Taktakon gyud nato kay dili ko gusto ana nga naa tay trabahante diri sa barangay nga manggamitay og drugas,” sumala ni Ralota.
Butang usab nga gihangop ni Lazarte human masayod nga dunay pipila ka barangay kapitan sa dakbayan nga padayong nipatrabaho sa ilang drug user nga kawani.
“Kung desidido si kap makiggubat sa illegal drugs iya gyud nang tangtangon if ever mapositibo sa confirmatory drug test,” nagkanayon si Lazarte.
Ang T. Padilla mao nay ikaduhang barangay sa siyudad nga gipaubos sa Cosap sa random drug test niining buwana human sa barangay Cogon-Ramos nga miresulta sa pagkasakop sa usa ka tanod nga drug user. (BANAT NEWS)