Cebu - Kasong arson ang gitakdang ipasaka sa usa ka anak ngadto sa iyang mga ginikanan ug igsoon kinsa giingong midaob sa ilang payag didto sa barangay Mangaco, lungsod sa Ginatilan niadtong Biyernes sa alas 9:30 sa gabii.
Ang mag-live in partner nga sila si Elmer Sanoy ug Avelina Damuag, pulos hingkod ang panuigon walay lipod-lipod nga mitumbok sa ilang ginikanan ug igsoon nga maoy mituyo og sunog sa ilang balay ug gibaharan pa silang pamatyon.
Ang mga suspetsadong amahan ug inahan mao sila si Demetrio Damuag, 76, ug asawa niini nga si Angelina Damuag, 46 , pulos mga mag-uuma, ug anak niini nga si Marilyn Damuag, 17.
Si SPO2 Arnold Omania sa Ginatilan Police Station mibutyag sa Banat News nga matud pa unang gisunog sa mga suspek ang mga senina sa mag-live in partner nga biktima sa alas 8:30 sa buntag niadtong Biyernes.
Matud pa ni SPO2 Omania nga si Elmer mitrabaho niadtong higayona sa usa ka konstruksyon sa lungsod ug alas 5:30 pa sa buntag kining migikan sa ilang balay, samtang si Avelina nga iyang kapuyo misayo usab sa pagpanglaba sa sapa, ug ang ilang upat ka bulan nga anak maoy nahabilin nga giduyan.
Midugang si SPO2 Omania nga namatikdan ni Avelina nga dunay kayo sa ilang balay hinungdan nga midali kini sa pagpauli ug pag-abot niya sa ilang balay, maoy naabtan niya ang iyang amahan, inahan ug igsoon nga miduslib ug midaob sa ilang tanang senina sa tugkaran sa ilang payag.
Gibutyag ni Avelina sa kapolisan nga samtang nag-anam na kaugdaw ang ilang mga senina, milanit og armas de fuego ang iyang amahan ug giti-on kini kaniya hinungdan nga mikurog siya sa kahadlok ilabi na dihang gibaharan siya sa pag-ingon nga “patyon ko kamo, human dauban ang inyong balay,” dugang asoy niya.
Midugang si Avelina nga dihang nahiuli ang iyang kapuyo nga si Elmer, iyang gisuginlan sa panghitabo ug tungod sa ilang kalisang namakwit sila ug didto matulog sa panimay sa ilang silingan nga si Wilfredo Ruben.
Miingon si Avelina nga nasalbar sila sa kamatayon kay ni-anang pagka alas 9:00 sa gabii, gibalik gyud sa iyang mga ginakan ug igsoon ang ilang payag ug didto gitiwasan kini pinaagi sa pagbubo og gas ug giduslitan hangtod nga napulbos ug naabo ang ilang pinuy-anan. – BANAT NEWS