Cebu - Dakong pabor si Cebu City Councilor Raul Alcoseba sa kamandoan ni PNP Director General Jesus Verzosa nga nag“ban” sa kapulisan paghimo og warning shot.
Ang warning shot sagad himoon sa kapulisan kung maggukod og mga kriminal o sa higayon nga dunay dili mopatuo sa ilang pagbadlong.
Apan kini idili na ni Verzosa sa kapulisan niining tuiga tungod sa nakita usab niining dili maayong epekto ngadto sa mga inosenting sibilyan.
Namatikdan sa heneral nga dilikado ang warning shot tungod kay daghan na ang gikatahong nangaigo niini nga mga bystanders.
Mibahad si Verzosa ngadto sa kapulisan nga mag-atubang unya og problema kung kini dili motuman sa iyang luwatan nga kamandoan.
Matud ni Alcoseba nga maayo ang tumong ni Verzosa ug kini iyang suportahan pinaagi sa pagpalabang unya og resulosyon sa City Council.
Ang konsehal nga maoy vice chairman sa Committee on Public Order and Safety sa City Council dakong uyon sa pag-ban sa warning shot.
Kini tungod kay may mga polis nga giingong magpatuyang lang og pasalba bisan wala kinahanglana hinungdan nga makaigo na hinuon og inosenting sibilyan.
Gikataw-an lang hinuon sa konsehal ang sugyot ni General Verzosa sa paggamit og whistle sa mga polis hulip sa warning shot.
Sugyot sa konsehal ngadto sa kadagkoan sa kapulisan nga mopatuman og mga programa sama sa marksmanship training aron mahingigo na ang butalo nga mga pulis. – BANAT NEWS