City Hall motabang sa pamilyang Osorio

Cebu - Andam motabang ang kagamhanan sa dakbayan sa Sugbu sa pamilya nga gibilin ni piskal Patrick Ian Osorio.

Kini maoy gipadayag ni acting mayor Michael Rama human mamatay ang piskal sa tambalanan mugna sa pagpamanhig kaniya sa duha ka tawo nga nagmotorsiklo niadtong Lunes sa hapon.

Apan dili pa hinuon matino sa acting mayor kung unsa nga tabang ang ilang mahatag ngadto sa nagbangotang pamilya.

Gipadayag ni Rama nga siya makigtagbo pa nila ni Konsehal Augustus Pe Jr. ug Konsehal Gerardo Carillo alang niini.

Apan pabilin gihapong nagmagahi ang acting mayor sa paghatag og cash reward niadtong makatabang alang sa dinaliang pagkasulbad sa kaso.

Gipasabot ni Rama nga ang reward anaa kanunay apan kinahanglang sulbaron una sa kapulisan ang pagpatay sa piskal.

Una nang gipasabot sa acting mayor nga ang paghatag og cash reward makahatag og katapol sa mga otoridad pagtuman sa ilang katungdanan.

Mas gusto ni Rama nga mohatag og reward, award ug ubang mga pasidungog niadtong makahatag og kasulbaran sa krimen.

Apan midugang ang acting mayor nga kung walay laing kapaingnan sa paghatag og solusyon sa maong kaso, iya kining himuon.

Nasayran hinuon nga ang kapulisan mihulma na og Task Force Osorio nga maoy gitahasan pag-ila ug pagdakop sa responsable sa krimen.

Samtang ang ubang law enforcement agency sama sa National Bureau of Investigation (NBI) mitabang na usab pag-imbistigar sa pagbanhig-patay sa piskal. – BANAT NEWS