Wa mohatag og 13th month pay gi-warningan

Cebu - Gipasidan-an sa kagamhanan ang mga establisamentong wala mohatag og 13th month pay sa ilang mga kawani sa miaging tuig nga mag-atubang og silot nga “double indemnity” o dobleng kantidad sa 13th month pay nga dawatonon sa usa ka kawani ang ilang bayran.

Ang maong pasidaan gipalanog ni RegionaL Director Elias Cayanong sa Department of Labor and Employment (DOLE-7) gumikan sa nagsugwak nga reklamo nga ilang nadawat nga naglakip ning maong problema.

Si Cayanong miawhag sa mga wala makadawat sa ilang 13th month pay sa pagpadangat sa maong reklamo ngadto sa DOLE aron kahimoan dayon kini og lakang.

Gipasabot ni Cayanong nga kung kapamatud-an kining siyam ka kompaniya nga gi-report ngadto sa iyang buhatan, nga wala mohatag og 13th month pay sa ilang mga trabahante, mapugos siya sa pagpahamtang sa maong silot ngadto sa mga tagdumala ug tag-iya sa maong mga trabahoan.

Gawas sa 13th month pay, ang   DOLE gihugpaan usab sa mga reklamong may labot sa illegal dismissal and unfair labor practices gikan sa mga trabahanteng natangtang sa ilang mga trabaho gumikan kay gipanak-opan ang ilang gitrabahoan.

Si Fe Cabigon, administrative officer sa National Labor Relations Commission (NLRC) miingon nga mikabat sa 3,025 ka mga reklamo ang nadawat sa Dole sa miaging tuig.

Matud pa ni Cabigon nga ang maong gidaghanon milapas na sa naandang gidaghanon nga 2,000 kapin nga ilang madawat sa matag tuig.

Dugang pa niya nga sa 3,025 ka mga kaso sa labor nga ilang nadawat, kasagaran niini may labot sa illegal dismissal, under payment ug claims alang sa ilang separation ug uban pang benepisyo.

Midugang si Cabigon pag-ingon nga ang labing bag-ong reklamo nga nadawat sa taga Dole naggikan sa mga trabahante sa   Maithland-Smith Inc. sa Sugbu ug Lear Automotive ug uban pa. – BANAT NEWS