Kooperatiba di angayang mabalaka - CDA

Cebu - Gipasalig sa Cooperative Development Authority kon CDA sa ilang depositors ug mga miyembro nga dili maapil sa mga bank holidays ang ilang pundo.

Sa interview sa DyRF, si CDA Regional Director Marlyn Estrella nagkanayon nga dili angayan nga mahadlok ang mga miyembro sa mga kooperatiba kansang mga pundo gipangdeposito sa mga cooperative banks ug dili sa mga rural banks.

Matud pa ni Estrella nga ang CDA kanunay nga nag-monitor sa dagan sa panundlanan sa mga kooperatiba sa tibuok rehiyon.

Si Estrella nangangkon nga sukad niadtong Oktobre hangtud sa Disyembre sa niaging tuig, kinse na ka distrito sa rehiyon ang ilang napahigayunan og cooperatvie forum aron mahimong stable ang kahimtang sa mga kooperatiba.

Ning bag-uhay lang pipila na ka mga rural banks ang nanirado human modeklarar og bank holidays hinungdan nga nangadismaya ang mga depositors ug ang uban nagdali-dali pagpang-withdraw sa ilang mga salapi. - Chester Abadilla (BANAT NEWS)