Osorio 'gunmen' sketch ipublikar

Cebu - Kapolisan nakakuha na og cartographic sketch sa duha ka nagmotorsiklong mamumuno ni Piskal Patrick Ian Osorio ug gikatakdang ipagawas sa publiko aron mailhan ug mataral ngadto sa hukmanan.

Ang cartographic sketch sa duha ka mamumuno gipakita ni Sr. Supt. Patrocinio Comendador ang Task Force Osorio commander apan sahi sa ubang sketches sa mga suspek, kini nagsul-ob gihapon og full-face helmet nga kolor yellow, ang gunman nagsul-ob og itom nga t-shirt samtang ang nagmaneho sa motorsiklo nagsul-ob sa pula nga t-shirt.

Si Comendador nagkanayon nga bisan tuod niini wala sila mawad-i og paglaum nga dunay makaila kanila diha sa publiko.

Nagtuo si Comendador nga dako ang posibilidad nga dihang nisibat ang mga akusado dunay mga tawo ang nakakita kanila ingon man sa dapit diin sila posibleng ulahing nasigpatan.

Wala hinuon isalikway sa kapolisan ang posibilidad nga dihang naka-distansya na ang mga mamumuno nag-ilis kini sa ilang mga sapot aron dili mailhan sa mga nigukod kanila.

Sa pagkakaron ang kapolisan wala pay kongkretong ideya kung si kinsa ang mga nipatay sa piskal lakip na ang mastermind niini gawas lang sa mga nahaunang mga ebidensyang ilang nakuha ug testigos.

Apan una nang gipahibalo ni Comendador nga nailhan na nila ug duna na sila’y pangalan sa duha ka mga mamumuno, nga ilang gihulagway nga mga lokal bosy nga gun-for-hire ug posibleng naa pa dinhi sa Sugbu ug wa pa makasibat.

Ang usa sa gitutukang motibo sa pagpatay may kalambigitan gyud sa trabaho ni Osorio isip piskal, sa pagkakaron tulo ka mga kasong may labot sa illegal drugs nga gikuptan ni Osorio ang gisubay sa mga imbestigador.

Si Osorio gibanhigan patay diha sa barangay Mambaling sa duha ka mga wala mailhing lalaking nagmotor niadtong Martes sa hapon. (BANAT NEWS)