Utok, Killer 'Sikop

Cebu - Suspetsado sa pagpatay ug gipasanginlang mastermind sa pagpatay sa usa ka Dutch national(di Polish sa nahaunang report) sa barangay Liboron, dakbayan sa Carcar nangadakpan sa gipahigayong operasyon sa mga polis niadtong Biyernes sa gabii diha sa Pier 3, dakbayan sa Sugbu.

Ang nag-unang motibo sa krimen nga gidudahan karon sa kapolisan mao ang kabahin sa kwarta gipanag-iya sa 90-anyos nga biktimang si Antonio Henrecus Luvke nga nagpuyo sa maong barangay.

Ang gipangdakop mao usab ang pag-umangkon sa namatay’ng asawa sa biktima nga si Amando Lapiña, 39-anyos, residente usab sa nahisgutang barangay ug drayber ni Luvke.

Gikostudiya usab si Cecil Pobrero human kini gitudlo ni Lapiña nga maoy misugo kaniya pagpapatay sa maong langyaw, si Pobrero kanhi kapuyo sa manghod sa asawa ni Luvke nga giilang si Charito Cabungcal.

Si Supt. Teofilo Siclot Jr., hepe sa kapolisan sa maong dakbayan sa pakighinabi niini sa Banat News kagahapon mibutyag nga si Lapiña naabtan nila diha sa Pier 3, dakbayan sa Sugbu padulong mosakay og barko paingon sa Maasin City, sa Leyte.

Samtang si Pobrero nga taga dakbayan sa Mandaue ilang giimbitar diha sa ilang buhatan kabahin sa maong hitabo tungod sa pasangil ni Lapiña nga mao kini ang misugo kaniya pagpapatay sa maong langyaw bugti sa bayad nga P20,000 nga giunhan lang og P500.

Matud ni Siclot nga si Charito Cabungcal usa ka tomboy nga manghud sa asawa ni Luvke nga si Florie ug mao nay miatiman sa langyaw human motaliwan si Florie.

Si Cabungcal ug si Pobrero sa wala pa magkabuwag gikatahong nagpuyo na sulod sa siyam ka tuig diha sa dakbayan sa Mandaue, maong dihang si Cabungcal na ang gipaatiman kang Luvke gidala niini si Pobrero ug gipapuyo sad sa Carcar uban kanila ni Luvke.

Gumikan sa pangidaron ni Luvke gikatahong gihatagan sa naulahi si Cabungcal og Special Power of Attorney (SPA) nga makahimo pag-withdraw sa iyang salapi diha sa bangko.

Si Pobrero ug Cabungcal dili palang dugay gikatahong nagkabuwag tungod sa giingong pakigrelasyon si Cabungcal og laing babaye ug mibuwag kini og puyo hinungdan nga ang nahibilin mao nalang si Pobrero pag-atiman kang Luvke.

Tungod kay wala na si Cabungcal sa panimalay ni Luvke si Pobrero   mao nay buot hatagan sa biktima og SPA ug misuway kini sa pag-revoke sa SPA ni Cabungcal.

Apan dihang nahibaw-an ni Cabungcal ang planong pag-revoke sa iyang SPA ilahang gipalayas si Pobrero.

“Puslan mang dili na siya makakwarta kang Luvke dili usab siya gustong makakwarta gikan sa biktima si Cabungcal maong gi-hire niya si Lapiña nga ipapatay si Luvke,” matud pang Siclot base sa nakuhang report sa mga imbestigador.

Sa pagkakaron gihan-ay pa sa kapolisan ang tanang impormasyon ug mga alegasyon nga magkonektar sa mga ebidensya ug pamahayag kabahin sa maong pagpatay alang sa pagpasaka og kaso.

Kahinumduman nga si Luvke nakaangkon og tulo ka samad dinunggaban sa dughan naabtan sa mga polis nga wala nay kinabuhi diha sulod sa iyang kwarto niadtong Biyernes sa kaadlawon. - BANAT NEWS