Rural bank manager mireklamo

Cebu - Midangop sa kapolisan didto sa lungsod sa Argao ug nagpa-blotter ang usa ka manager sa bangko tungod sa gipalakaw nga mga tabi tabi nga bangkarota na ang ilang bangko ug piligro na kining manirado nga nakapa-alarma usab sa ilang mga depositor.

Ang manager sa Rural Bank of Argao nga nagbasi sa Poblacion Argao Cebu nga si Johny Rose Sardañas, 32 anyos, minyo ug molupyo sa barangay Canbanua sakop sa maong lungsod nagpa-blotter sa buhatan sa kapolisan niadtong Huwebes sa alas 4:30 sa hapon batok sa mga tawo nga gitumbok nila nga maoy nagpakatap sa balita nga hapit na sila manirado.

Matod ni PO1 Eduardo Semilla sa Argao Police dihang nahinabi sa Banat News subay sa blotter nga gibasihan niini ang gitumbok sa manager sa bangko nga maoy responsabli mao sila si Loi Rodua, hingkod ang panuigon, minyo ug manager sa CEBECO Dumanjug, magtiayon nga sila si Nestor ug Ester dela Calzada ug ang accountant sa lungsod sa Argao nga si Teodora Carillo.

Ang manager sa bangko nga si Sardañas mitug-an sa kapolisan nga mao kini sila ang nagpalakaw sa mga tabi tabi nga nag-ingon nga nasirad-an na ang ilang ‘sister bank’ didto sa lungsod sa Dalaguete ug ang sunod nga manirado mao ang ilang bangko sa Argao.

Gihulagway kini ni Sardañas nga nakahatag og tumang kabalaka sa ilang mga depositor hinungdan nga nagpunsisok kini sayo pa sa buntag niadtong Huwebes aron i-withdraw ang ilang mga deposito tungod sa kahadlok nga manirado.Hinoon kagahapong adlawa ang kadagkuan sa Rural Bank of Cebu South nga maoy mother company nibisita kini sa lungsod sa Argao kagahapon ug maoy mipasabot sa ilang mga depositor nga ‘stable’ ang ilang bangko ug dili gyud kini manirado bisan pa og mang-withdraw sa ilang account ang daghang mga depositor niini. – BANAT NEWS