2 ka dalaga gitulis

Cebu - Duha ka dalaga nabiktima sa panulis sa managlahing lugar ning dakbayan sa miaging adlaw.

Ang maong mga biktima mao sila si Marites Sanchez, 28, taga Lapu-lapu City, ug Blue Jane Geniston, 28, nga taga Lorega.

Si Sanchez naglakaw diha sa Gorordo Avenue paingon sa Ayala Mall sa sayong kagabhion dihang kalit lang mitumaw ang usa ka wala hiilhing armadong tawo nga mition sa iyang armas de fuego ug mideklara nga tulis.

Aron sa paglikay nga madaot ang iyang kinabuhi, gihatag nalang ni Sanchez ang iyang handbag ngadto sa tulisan nga gisudlan sa cellphone ug cash nga P6,800 ug uban pang mahinungdanong papeles.

Samtang si Geniston naglakaw sa may General Maxilom Avenue sayo sa kabuntagon dihang usa gihapon ka armadong tawo mition kaniya og armas de fuego ug mideklarar og hold- up.

Gumikan sa kakuyaw, gitunol nalang sa biktima ang iyang cellphone ug cash nga P500 ngadto sa tulisan.

Ang maong mga kaso padayon pang giimbistigar sa kapolisan ning dakbayan. – BANAT NEWS