Kagid sa City Jail Nagsugod sa usa

Cebu - Warden sa Talisay City Jail, Supt. Johnson Calub ang mibutyag nga kasagaran sa mga piniriso ang nataptan og kagid tungod kay natakdan kini sa usa ka pinirisong nagsakit niini nga nasulod diha sa city jail duha ka tuig na ang nakalabay.

Giangkon usab ni Calub nga dunay usa ka piniriso nga nasakit og stage 3 tuberculosis nga gipadala na niadtong bulan sa Oktobre sa Muntinlupa.

Si Calub kinsa usa usab ka nurse nagkanayon nga usa nalang ka priso ang may sakit nga TB ug padayong gitambalan sukad pa niadtong Disyembre.

Matud pa niya nga ang kaniadto pinirisong nagdala og sakit nga kagid sa panit diha sa maong bilanggoan duna say sakit sa pangisip maong gipadala kini ngadto sa Mandaluyong Mental Hospital ug ning bag-uhay lang nabalik na sa iyang pamilya.

Nasayran sa pagsusi-susi ni Calub nga ang maong piniriso gibuhatan og sala sa mga kabanay aron lang mapriso tungod kay kanunay kining manghasi diha sa ilaha sa sitio Mananga, barangay Tabunok kaniadto ug dihang nasutang may deperensya gyud ang pangisip niini gipapauli kini sa mental hospital sa pamilya.

Kabahin sa problema karon sa mga kagid sa city jail, si Calub naglaraw nga mopalit og medisina alang niini apan ning bag-uhay lang nasuta niyang wala pay stocks sa maong tambal.

Ang mga ointments nga gihatag ni Konsehal Shirley Belleza nga itambal sa mga kagid giobserbahan pa kung epektibo.

Ang paghatag natigayon dihang mihimo og medical mission si Belleza uban sa doktor, nurse ug midwife sa RHU tungod sa nadawat nga suwat gikan sa usa ka piniriso nga nangayo kaniya og pagkaon ug mibutyag nga gipangtaptan sila og kagid. – BANAT NEWS