Cebu - Ilusad na karong adlawa ang Sinulog 2009 pinaagi sa pagpahigayon sa Sinulog Launching Parade karong hapon.
Ang kalihukan sugdan pinaagi sa usa ka Santos nga Misa diha sa Basilica del Santo Niño karong alas 2:00 ang takna sa kahaponon.
Human niini isunod gilayon sa mga organizers ang launching parade nga manukad diha sa nahisgutang simbahan agi sa Osmeña Boulevard.
Matud sa executive director sa Sinulog Foundation, Ricky Ballesteros, nga ang parade karong hapon maoy labing taas sa kasaysayan sa Sinulog.
Kini tungod kay ang rota mulahos ug mutuyok sa Fuente Osmeña Rotunda una mupadulong sa Cebu City Sports Center diin adto tapuson pinaagi sa usa ka programa.
Ang launching parade salmutan sa kapin sa napulo ka mga tunghaan sa dakbayan nga mosayaw ug magrepresentar sa nagkadaiyang festival sa Sugbu.
Ugmang adlawa, ipahigayon na usab ang Sinulog sa Kabataan sa Dakbayan diin kini salmotan sa nagkadaiyang mga tunghaan sa siyudad.
Samtang unya sa adlaw’ng Domingo ipahigayon usab ang Sinulog sa Kabataan sa Lalawigan nga salmotan sa mga tinun-an sa nagkadaiyang tunghaan sa lalawigan.
Mokapin sa 20 ka contingent ang gipaabot nga mosalmot sa maong indigay ug maoy magtigi sa elementary ug high school division.
Ang mogawas nga 20 ka contingent nga labing maayo sa maong indigay automatic nga makasalmot sa Sinulog Grand Parade karong Enero 18. – BANAT NEWS