P50 mil nga ganti sa makatudlo sa suspek

Cebu - Andam mohatag og P50,000 nga reward ang dakbayan sa Mandaue sa makatudlo sa suspetsadong nitulis ug mipatay sa usa ka negosyanteng babaye sa barangay Cabancalan sa maong dakbayan.

Si Bise Mayor Carlo Pontico Fortuna nga nahinabi sa Banat News mibutyag nga dako og matabang sa kasulbaran sa krimen ang maong ganti aron mahatag ang dinaliang hustisya sa biktima.

Ang ginang nga gitulis ug gipatay atubangan mismo sa 8-anyos niining anak giilang si Maria Jocelyn Mendoza kinsa nagbilin og tulo ka mga anak nga naa pa karon sa kahadlok.

Matud pa ni Fortuna nga natagbaw siya paninguha sa kapolisan nga iyang gihatagan og 48 oras aron kini sulbaron human mailhi ang suspetsado nga usa ka drayber sa traysikol.

Base sa impormasyong gihatag ni Fortuna ang suspek mao ra ang tighatud ug kuha sa mga anak sa biktima sa tunghaan.

Si Fortuna miingon naglakip sa mga testigos sa krimen nga na-shock hangtod niining panahona mao ang 8-anyos nga anak nga babaye nga nakakita pa sa suspetsado nga misaka sa panimalay sa biktima dihang nahitabo ang krimen. – BANAT NEWS