Task Force Osorio gitukod

Cebu - Gihulma na ang Task Force Osorio sa kapulisan sa dakbayan sa Sugbu kagahapon sa buntag kinsa maoy motutok sa imbestigasyon sa pag-ambush patay kang Assistant Cebu City Prosecutor Patrick Ian Osorio niadtong Martes sa hapon diha sa may Gochan St., barangay Mambaling ning dakbayan.

Si Police Regional Office (PRO-7) Chief Supt. Ronald Roderos nimando og hiniusang pwersa sa pag-imbestigar sa maong ambush nga panguluhan ni Cebu City Police Office director Sr. Supt. Patrocinio Comendador isip task force commander.

Sila suportahan sa imbestigasyon sa PNP Crime Laboratory, Criminal Investigation and Detection Group (CIDG-7) National Bureau of Investigation (NBI-7), Prosecutors Office, ingon man sa Regional Intelligence Division.

Ang maong task force gihimo aron mausa ang imbestigasyon ug adunay focus ang kaso pag-ila sa mga suspetsado ingon man sa mastermind.

Ang kapulisan wala pa gyuy matumbok nga suspek ug motibo.

Subay niini si Roderos nisugyot usab sa mga lokal nga opisyal sa dakbayan sa Sugbu sa pagpanday og ordinansa o balaudnon nga idili na ang pagsul-ob sa full-face helmets labi kun tinted ang samin niini.

Subli usab niyang gisugyot nga adunay mga dagkong plate number sa motorsiklo diha mismo sa atubangan aron makita gilayon sa publiko.

Gibutyag ni Comendador nga duna na silay nadawat nga mga vital informations gikan sa Prosecutors Office nga makatabang sa imbestigasyon sa pag-ambush kang piskal Osorio.

Usa sa mga gituuhang motibo may kalambigitan sa trabaho niini nga posibleng may tawong nasilo sa biktima.

Samtang ang mga kabanay ni Osorio nanawagan og hustisya sa kamatayon niini ug mipadayag nga nakurat sila sa kalit nga pagtaliwan niini, uwahing naka-text ni Osorio sa iyang asawa niadto ala-una sa adlaw’ng Martes nga kini mosayo og pauli. – BANAT NEWS