Way 'cash reward sa Osorio case - Mike

Cebu - Nagdumili paghatag og cash reward si Cebu City Acting Mayor Michael Rama alang sa dinaliang pagkasulbad sa pagpamanhig kang Assistant City Prosecutor Patrick Ian Osorio, samtang gikundenar sa mga sakop sa Integrated Bar of the Philippines Cebu Chapter ang maong pagpatay.

Bisan pa man kung nabatasan na sa kagamhanan sa dakbayan ang paghatag og cash reward alang sa dinaliang kasulbaran sa mga kaso, buot ni Rama nga buhaton sa kapolisan ang ilang trabaho.    

Gipadayag hinoon sa acting mayor ang iyang kasubo sa pagbanhig kang piskal Osorio uban sa pagkondenar sa maong hitabo.

Samtang ang presidente sa IBP- Cebu Chapter, Briccio Boholst nipadayag nga makapabalaka na ang maong panghitabo gumikan kay dili lang kini maoy una nga pagpamanhig kanilang mga anaa sa legal profession.

Gitumbok ni Boholst dihang nahinabi sa Banat News ang pag-ambush-patay kang Atty. Richard Sison niadtong milabayng tuig nga hangtud karun pabiling walay kasulbaran.

Gihulagway kining maong panghitabo ni Boholst nga usa ka dakung insulto dili lang sa balaod ug gobiyerno kundili lakip na sa kahapsay ug kalinaw sa Sugbo. – BANAT NEWS