Piskal Osorio Namatay

Cebu - Nakabsan gyud sa iyang kinabuhi si Cebu City Assistant Prosecutor Patrick Ian Osorio mga pasado alas 3 kagahapon sa hapon sulod sa Perpetual Succor Hospital ning dakbayan.

Si Atty. Jesus Osorio Sr. mismo ang mikonpirmar sa Banat News sa kamatayon sa iyang anak nga assistant prosecutor nga gibanhigan sa miaging hapon sa dalan Gochan, barangay Mambaling ning dakbayan.

Sumala pa ni Atty. Osorio nga una nilang hatagan og pagtagad mao ang pagpahiluna sa patay’ng lawas sa iyang anak nga namatay. Dugang niya nga tukion sa iyang pamilya asa ipahiluna ang lawas sa assistant prosecutor. Ang mga Osorio lumad nga taga lungsod sa Dalaguete.Una niini, si Cebu City Prosecutor Nicolas Sellon mipadayag sa DySS sa kasubo nilang mga sakop sa National Prosecution Service (NPS) tungod sa nadawat nilang report nga namatay si assistant prosecutor Osorio.

Si Sellon nagkanayon nga human madawat ang report, nagtapok gilayon silang tanan sa iyang buhatan ug nag-rosaryo.

Matud ni Sellon nga bisan sa nahitabo sa ilang kauban, dili sila mohangyo og police escort. Dugang pa niya nga doblehon lamang nila ang pag-amping.

Sa report sa usa sa mga telebisyon, ang kanhi presidente sa Integrated Bar of the Philippines (IBP-Cebu City chapter) Atty. Alex Tolentino mipadayag nga base sa gitug-an niya sa doktor nga iyang gika-estorya adunay dakong ugat nga naigo diha sa ubos nga lawas ni piskal Osorio. Gituohan nga naapektahan ang mga major organ sa lawas sa piskal.

Si Sellon nagkanayon nga isumiter nila sa National Bureau of Investigation ang tanang kaso nga gihuptan ni piskal Osorio.

Si Sr. Supt. Patrocinio Comendador, director sa Cebu City Police Office nagkanayon nga “gun for hire” ang mipusil-patay kang Osorio. Matud pa ni Comendador nga dili pa sila makatumbok kun mga professional ba ang mitira niini.

Giangkon ni Comendador nga maglisod sila sa pag-ila sa mga mamumuno gumikan kay naka-fullface helmet kini. Hinuon, matud niya nga aduna silay laing pamaagi sa pag-ila sa mga mamumuno ug mastermind pinaagi sa pagsubay sa mga kasong gihuptan ni Osorio.

Gihulagway niini nga gi-estudyuhan pag-ayo sa mga mamumuno ang pattern ni piskal Osorio sa panahon nga mouli kini gikan sa iyang trabaho ug dako ang posibilidad nga gisundan kini.

Ang kapolisan mibutang karon og security details sa pamilya ni Osorio.

Bukas usab sila sa CCPO sa pakig-alayon sa National Bureau of Investigation (NBI-7) ingon sa Criminal Investigation and Detection Group (CIDG-7) sa pag-imbestigar sa maong krimen.

Nasayran nga si piskal Osorio padulong na untang mopauli paingon sa ilang panimalay sa Deca Homes sa Minglanilla sakay sa iyang Toyota Revo (GPB-203) sa dihang pag-abot sa dalan Gochan, duol sa Mambaling Police Station, kalit lang gipusil sa duha ka mga lalaking nagsakay sa pula nga motorsiklo makaduha ka higayon.

Si piskal Osario nakaangkon og duha ka samad sa tiyan gikan sa bala sa kalibre .45 nakapangayo pa og tabang sa mga traysikad driver sa nahisgutang dapit hinungdan nga nadali pagdala sa Miller Hospital sa dalan Tres de Abril, barangay San Nicolas-Proper. – BANAT NEWS