Pamilyang Bacolod nasubo sa kalangay sa hustisya

Cebu - Gibatig hilabihang kasubo ang nahibiling miyembro sa pamilyang Bacolod tungod sa kalangay sa husay sa kasong parricide nga gipasaka batok kang Philippine Benevolent Missionary Association (PBMA) supreme master Ruben Ecleo, ang akusado sa pagpatay sa iyang kaugalingong asawa nga si Alona Bacolod Ecleo niadtong Enero 5, 2002.

 Si National Vice President Thelma Chiong sa Crusade Against Violence nagkanayon nga ang kabanay sa pamilyang Bacolod masulob-on kaayo tungod kay taastaas na ang panahon sa ilang pagpaabot sa hustisya sa kamatayon ni Alona.

Si Chiong nagkanayon nga sukad niadtong bulan sa Pebrero sa miaging tuig, wala na ipadayon ang hearing ni Ecleo.

Ang halos usa ka tuig nga pagkaundang sa hearing sa kaso maoy nakapasubo sa mga igsoon ni Alona sa kahadlok nga dili na nila maangkon ang hustisya.

 Dugang pa ni Chiong nga ang kalangay sa kaso batok sa supreme master sa PBMA naggumikan sa pag-interbener ni kanhi RTC-7 Executive Judge Fortunato De Gracia kinsa nagdumili sa pagdawat sa pagdumili ni Judge Geraldyn Faith Ycong sa padayong pagkupot sa maong kaso. – BANAT NEWS