Cebu - Usa ka sakop sa piskalya ang gibanhigan sa duha ka wala mailhing mga lalaking nagsakay og motorsiklo kagahapon diha sa Gochan Village sa barangay Mambaling ning dakbayan kagahapon sa hapon.
Ang biktima giilang si Assistant City Prosecutor Patrick Osorio, 37, lumad nga taga lungsod sa Dalaguete ug kasamtangang nagpuyo sa Phase 2 sa Deca Homes sa Minglanilla.
Si Osorio nagluwan sa iyang sakyanan dihang kalit nga gituparan sa duha ka mga suspek ug gipaulanan og bala.
Si Osorio mao ray luwan sa iyang kolor abuhong Toyota Revo nga nagtangag og plakang GPB-203 nga nisubay sa nahisgutang dapit dihang gibanhigan.
Sumala pa sa duha ka mga testigos(mga pangalan gipugngan sa Banat News alang sa ilang seguridad) nga diha gyud sa pagkahitabo, ang mga mamumuno nagsakay og kolor pula nga binabayeng motorsiklo apan pakyas sila pagkuha sa plaka niini.
Ang drayber gikatahong nagsuot og t-shirt nga pula samtang ang backrider nga mao sad ang giingong gunman nagsuot og shortpants ug kolor itom nga t-shirt apan parehong nagsuot og kolor yellow nga full-face helmets.
Sumala pa sa mga testigos ngadto ni SPO3 Alex Dacua ang imbestigador sa Homicide Section base sa paghulagway pulos dagkuon og mga lawas ang mga suspek.
Matud pa sa mga nakakita nag-aginod ang sakyanan ni Osorio padulong gawas ngadto sa Natalio Bacalso Ave. niadtong tungura ug diha sa luyo magsunod ang mga suspek ug dihang nakasikit sa tuong bahin sa sakyanan kalit nga mibunot og armas ang backrider ug dayong pabuto sa armas duha ka higayon.
Tungod sa mga buto sa armas nanghupo ang mga tawo sa palibot ug nakadungog nalang dayon sila nga mipasutoy ang mga suspek padulong sa Natalio Bacalso Avenue ug miliko ngadto sa habagatang bahin sa dakbayan.
Si Osorio migawas sa iyang sakyanan nga nagkadugo ug nagpakitabang hinungdan nga gidali nila kini og sapupo ug diha-diha nalumoy na ang piskal.
Si Osorio daling gidala sa mga testigos sakay sa usa ka taxi ngadto sa Miller Hospital apan gumikan sa kaseryoso sa iyang kahimtang wala kini gibalhin sa laing tambalanan ug padayon hangtud ning pagsulat sa balita ang pag-abuno og dugo kaniya, base sa report sa DySS giingong sa tiyan ang igo sa maong piskal.
Base usab sa pagsusi sa mga imbestigador sa sakyanan walay timailhang milapos ang bala diha sa pikas bintana kilid sa biktima.
Usa ra ka basiyo sa kalibre .45 nga bala ang napalgan sa Scene of the Crime Operation sa lugar nga gituuhang gikan sa armas sa mga mamumuno.
Ang kapolisan di pa makatino kung unsay motibo sa pagpamusil apan dako ang pagdudang posibleng kini may kalambigitan sa mga kasong iyang gipanggunitan isip piskal.
Samtang walay mga kabanay niini nga diha sa tambalanan kagabii ang nakahatag og konkretong pamahayag kung duna bay mga timailhang gihulga ang biktima.
Gawas pa niini, susihon usab sa kapolisan ang ubang anggulo lakip na personal, pamilya ug uban pa samtang nagsugod na ang imbestigasyon sa pag-ila sa mga mamumuno ug sa posibilidad nga mastermind.
Usa ka tigbalita nga nagkober sa Palace of Justice Beat nagkanayon nga walay libog ang maong piskal.
“Smiling man na siya kaayo, approachable, wala gyud nay libog…mo-entertain gyud og complainants,” sumala pa sa maong tigbalita.
Si Osorio kanhi nadestino isip resident prosecutor sa Regional Trial Court branch 24 nga usa ka family court una pa mabalhin isip assistant city prosecutor. – BANAT NEWS