Retired US army namatay sa hotel

Cebu - Usa ka retiradong US army ang napalgang patay sulod sa lawak sa usa ka hotel sa Fuente Osmeña, Cebu City kagahapon sa alas 6:30 sa buntag.

Ang patay’ng lawas giila nga iya ni Franklin Oliver Blair, 90, usa ka retiradong US army, ug lumad nga taga Honololo, Hawaii kinsa kasamtangang nagpuyo sa Elegant Circle Inn sa Fuente Osmeña.

Matud pa ni Venus Cinco, Assistant Manager sa maong hotel nga ang biktima diha na magpuyo sukad pa niadtong 2005.

Si SPO4 Alex Dacua, sa Cebu City Police Office nagkanayon nga nasuta nila nga walay foul play ang maong kamatayon sa langyaw kay walay mga timailhan nga gituyo kini sa pagpatay o kaha naghikog kini, apan sa gihapon iyang giawhag sa mga tagtungod nga angay kining pa-autopsihan.

Nasayran nga si Blair kaduha na maminyo og pulos Filipina apan tungod kay pulos na nangamatay, kaduha usab siya mabiyudo hangtod nga nag-inusara nalang kining nagpuyo dinhi sa Cebu.

Ang patay’ng lawas ni Blair anaa karon sa San Fernando Funeral Homes samtang padayon pang gisuta ang tinuod nga hinungdan sa kamatayon niini. – BANAT NEWS