Cebu - Naukay kagahapon sa kaadlawon ang mga molupyo sa Montery Homes Subdivision sa barangay Mohon, dakbayan sa Talisay dihang ang duty nga gwardiya sa ilang subdivision naghubo nga nagpawagayway nalang sa kinatawo samtang nag-roving sa palibot sa subdivision.
Si Mardy Banal usa sa nagpuyo sa maong subdivision mipahibawo dayon sa Talisay City Police Station diha sa barangay Poblacion ug gisumbong ang maong hitabo.
Ang grupo sa alert team maoy miresponde dayon ug naabtan nila sa akto ang guwardiya nga wala gyuy sapot bisan underwear ug nagpatabyog sa iyang kinatawo samtang nagsuroy-suroy sa palibot sa subdivision.
Maoy hinungdan nga nakahukom ang mga polis sa pagdala niini ngadto sa ilang buhatan para sa “safekeeping”.
Nasayran nga nawad-an sa maayong pangisip ang maong guwardiya tungod kay wala na kini makaila sa iyang ngalan ug nagdumili pa kini sa pagkuyog sa mga polis.
Si Erico Fernandez, operations manager sa Gradelock Lsia Employee Multipurpose Cooperative (GLEMPCO) Security Agency nga nahimutang diha sa Ishmael Business Center, sa MJ Cuenco Avenue, dakbayan sa Sugbo miadto sa Talisay Police Station sa barangay Poblacion kagahapon sa mga alas 4:30 sa kadlawon.
Si Fernandez na maoy mibutyag nga ang ngalan sa maong guwardiya mao si Armando Villanueva, hingkod ug wala ikabutyag ang address niini.
Hangtud sa pagsulat ning maong balita nagpabilin pa sa kustodiya sa kapolisan sa Talisay ang maong guwardiya nga wala gyud mosul-ob sa iyang senina ug karsones. – BANAT NEWS