Cebu - Gisugdan na usab sa Cebu City Office for Substance Abuse Prevention (Cosap) pagpaubos sa kinalit nga drug test ang kabarangayan sa dakbayan ug usa sa mga barangay tanod ang mitumaw nga positibo sa paggamit og drugas.
Niadtong miaging gabii, ang mga opisyal ug mga kawani sa barangay Cogon-Ramos maoy gisubhan sa Cosap niining tuiga pagpaubos sa random drug test.
Kapin sa 50 ka mga empleyado ug mga opisyal sa barangay pinanguluhan ni kapitan Omar Durano maoy gipailawom sa drug screening test.
Gibutyag sa Cosap chairman nga usa ka barangay tanod nga nipailawom sa kinalit nga drug test ang napositibo nga tigamitan og shabu ug kinahanglan pa hinuong ipailawom sa confirmatory test ang unang resulta.
Apan karon pa lang gipadayag nang daan ni Durano nga taktakon sa katungdanan ang ilang barangay tanod nga adis-adis.
Niadtong miaging tuig, kapin usab sa napulo ka urban barangay sa siyudad ang gipaubos sa Cosap sa kinalit nga drug screening test.
Kadtong mga barangay tanod, garbage collector ug ubang mga kawani nga napositibo sa paggamit og ginadiling drugas, gipanaktak na sa ilang katungdanan.
Niingon si Lazarte nga niining semanaha lain na usab nga barangay sa dakbayan ang ilang ipaubos sa kinalit nga drug test.
Gitataw hinoon sa Cosap chairman nga ang ilang hatagan og prayoridad sa drug test mao kadtong mga barangay nga bag-o ang kapitan. Nasayran gikan sa Cebu City ABC nga kapin sa katunga sa 80 ka mga barangay sa siyudad ang bag-o og mga kapitan. – BANAT NEWS