Mga bombero gisermonan ni Rama

Cebu - Nakatilaw og sermon ni Cebu City Acting Mayor Michael Rama ang mga sakop sa Cebu City Fire Department kagahapong adlawa tungod kay naobserbahan niini diha mismo sa pipila ka fire sub-stations sa siyudad nga iyang nabisita nga walay mga disiplina ang mga bombero.

Matud sa acting mayor nga siya mismo nakasaksi nga ang mga fireman magsul-ob lang og kamisin, short pants ug magtsinelas.

Ang labaw’ng gikadismaya ni Rama mao ang iyang nakita nga mga botelya sa ilimnong makahubog gawas nga nanimahong angso ang fire sub-stations.

Gusto sa acting mayor nga disiplinahon ni City Fire Marshall Superintendent Ismael Codilla ang badlungon niyang mga sakop.

Ang dakbayan dunay siyam nga fire sub-station ug kini anaa sa barangay Parian, Lahug, Talamban, Mabolo, Pahina Central, Sawang Calero, Pardo, Guadalupe ug barangay Labangon.

Sa pikas bahin gimanduan usab ni Rama si Codilla nga mopahigayon og seryosong pag-inspeksyon ilabi na sa mga balay kahilayan sa dakbayan.

Dili buot ang acting mayor nga masinati dinhi sa siyudad ang nahitabo didto sa Bangkok, Thailand niadtong miaging buwan diin daghang kinabuhi ang nakalas human mangatanggong pag-ulbo sa sunog tungod sa kakuwang sa fire exits.

Gimanduan ni Rama si Codilla nga sirad-an ang mga balay patigayon sa siyudad partikular na sa mga lodging ug boarding houses nga nakalapas sa fire code.

Sa samang higayon gipahimangnoan usab sa acting mayor ang fire marshal nga mobarog sa kaugalingon ug dili magsalig sa kagamhanan sa dakbayan.

Gusto ni Rama nga pangayoon ni Codilla ang ilang gahin gikan sa Bureau of Fire Protection (BFP) aron gamiton niini pagpalambo sa kabumberuhan sa siyudad.

“Of course, dili mi mo-deprive ninyo but you should claim what you deserve and what you ought to be for Cebu City, you must do it, this is now the time to stand on your own, dili mahimo nga papahoy-pahoy mo, otherwise, I will question your competence as a leader,” nagkanayon si Rama. – BANAT NEWS