CEBU - Pormal nang milingkod isip officer-in charge pagka-director sa Mandaue City Police Office si Sr. Supt. Orlando Ualat kagahapon sa buntag.
Si Ualat maoy napilian ni Mandaue City Mayor Jonas Cortes sa lima ka mga pangalan nga gisumiter ngadto kaniya.
Atol sa courtesy call ni Ualat sa buhatan sa mayor kagahapon sa buntag pasiunang mando ni Cortes ang pagmentinar sa kahapsay ug kalinaw sa dakbayan ug ang pagsumpo sa mga illegal nga kalihukan sama sa drugas ug sugal.
Lakip sa mando ni Cortes ang daling kasulbaran sa duha ka kasong pagpanulis ning bag-uhay lang nga mikalas sa usa ka ginang ug ang pagpanulis nga misakiyo og kapin P2 milyones sa usa ka negosyante diha sa Subangdaku.
Mga 11:13 kagahapon sa udto gi-turn-over ni Supt. Vicente Mersan Premne kang Ualat ang command flag sa MCPO sa usa ka simpleng seremonyas.
Sa maong kalihukan gipadayag ni Premne nga nalipay siyang si Ualat ang napilian sa mayor gumikan kay sinati na niini ang kalidad sa panarbaho ni Ualat ug mipasalig siyang mosuporta sa mga kampanya kontra krimen niini.
Si Premne mao na karon ang deputy ni Ualat sa MCPO ug sa 107 niini ka adlaw nga pagdumala sa MCPO isip officer-in charge nawagtang na ang magmotor nga kalit mamusil ingon man away sa mga fraternities.
Ang pormal nga turnover kagahapon gitambungan nila ni Sr. Supt. Marcelino Garbo ug Supt. Anthony Obenza nga mao na karoy director sa Regional Deputy Director for Human Resource Development Division sa PRO-7. BANAT NEWS)