CEBU - Usa ka vintage bomb nga gituohang gigamit pa sa panahon sa nilabay’ng Ikaduhang Gubat sa Kalibutan ang nakaplagan sa mga opisyal sa barangay samtang nagpahigayon sa ilang tinuig nga pagpanglimpyo sa barangay Tangke siyudad sa Talisay niadtong niaging hapon.
Ang tanod nga si Hilario Valmero sa barangay Tangke maoy nitawag sa kapulisan tungod sa usa ka karaang bomba nga ilang nakit-an nga nalubong sa atubangang bahin sa barangay hall atol sa ilang pagpanglimpyo sa palibot niini.
Ang maong bomba gi-turn-over dayon sa kapulisan nga gihulagway ni PO1 Oliver Dacua sa Talisay City Police dihang nahinabi sa Banat News nga susama og gidak-on sa usa ka paa sa tawo nga karaan na kaayo ug gitay-an na.
Matud ni Dacua nga adto nila ipasa ang maong bomba sa bomb disposal team sa Cebu Police Provincial Office (CPPO) aron malikay sa peligro ang publiko.
Gituohan ni Dacua nga aktibo pa kini ug mahimo pang mobuto. BANAT NEWS)