Krimen mosaka

CEBU - Napanglantawan ni Cebu City Councilor Raul “Yayoy” Alcoseba nga musaka ang crime rate sa nasud lakip na dinhi sa Sugbu niining tuiga.

Kini kung padayon usab nga masinati ang financial crisis sa tibuok kalibutan nga naglakip na dinhi sa Pilipinas.

Ang konsehal nga maoy vice-chairman sa Committee on Public Order and Safety sa City Council nabalaka sa mamahimo unyang epekto sa krisis.

“Kung maglisod na ang mga tawo dili gyud na malikayan ang kasamok kay panahon sa kawad-on mamahala na man lang bisan unsay mahitabo dili na mag-mind kung unsay linugdangan sa ilang gihimo ang importante nga mabuhi sila,” sumala ni Alcoseba.

Pahimangno ni Alcoseba ngadto sa kapulisan sa dakbayan nga hingusgan pa ang kampanya niini batok sa kriminalidad niining tuiga.

“Hingusgan lang gyud ang drive against criminality kay panahon sa kalisod naa man gyud nang kawat, tulis ug uban pa,” dugang pamahayag sa konsehal.

Una na hinuong gipasigarbo sa kapulisan sa dakbayan nga niminos ang crime rate sa siyudad niadtong miaging tuig.

Kini base usab sa comparative crime statistics niadtong tuig 2007 ug 2008 nga gipagawas sa Cebu City Police Office (CCPO).

Ang talaan sa kapulisan nagpakita nga ang crime volume sa dakbayan niadtong tuig 2007 niabot og 2,746 samtang niadtong miaging tuig mikabat lang og 2,512 ka kaso.

Gikataho usab nga mas taas ang crime solution efficiency sa kapulisan niadtong miaging tuig itandi niadtong 2007.

Kini gihulagway ni CCPO Director Senior Superintendent Patrocinio Comendador nga usa ka kalampusan sa iyang mga ginsakupan.

Gihangop ni Alcoseba ang maong kalamboan apan ang konsehal nidugang nga kini kinahanglan paningkamutan sa kapulisan nga matupngan o malabwan pa niining tuiga.   BANAT NEWS)