Kaso ni Ecleo wala pay desisyon sa Korte Suprema

CEBU - Walo na ka bulan nga natanggong ang kasong parricide batok ni Philippine Benevolent Missionaries Association supreme master Ruben Ecleo, Jr. nga maoy gipasanginlang niunay og patay sa iyang asawa nga si Alona Bacolod Ecleo niadtong Enero 5, 2002.

Si RTC-7 Judge Geraldyn Faith Econg, ang katapusang huwes nga nikupot sa kaso batok kang Ecleo nagkanayon nga unom na ka tuig ang milabay ug hangtud sa ikapitong anibersaryo sa pagpatay kang Alona wala pa gyud mahusay ang maong kaso.

Matud pa ni Econg nga sukad pa niadtong bulan sa Mayo sa nakalabay nga tuig na-pending sa Korte Suprema ang kaso apan hangtud karon wala pa siya makadawat og notisya kun nadesisyonan na ba ang mosyon kun si kinsang huwes ang makapadayon sa pagdungog sa maong kaso.

Nasayran nga ni-inhibit si Econg sa maong kaso tungod sa petisyon sa prosecution nga may bias sa kampo sa akusado tungod kay nagdumili siya pag-rule sa mosyon sa prosecution nga bakwion sa lower court ang P1 milyones nga piyansa ni Ecleo nga piskay na ang panlawas niini ug dili na ‘walking time bomb’ tungod sa iyang sakit sa kasingkasing.

Apan ni RTC-7 Executive Judge Fortunato De Gracia nagdumili sa pagdawat sa pag-inhibit kang Econg. BANAT NEWS)