CEBU - Wala makaresponde ang firetruck sa lungsod sa Tudela Isla sa Camotes human niulbo ang dakong sunog niadtong Domingo diha sa barangay Calmante gumikan kay giingong gidala ang yawe niini.
Ang alarma sa sunog nadawat sa kabomberohan ala-una sa hapon niadtong Domingo ug gipaubos lang sa first alarm diin ang firetruck sa San Francisco maoy nakaresponde sa maong sunog.
Mokabat sa P300 mil ang kinatibuk-ang danyos sa maong sunog nga milamoy sa lima ka mga panimay nga pulos ginama sa light materials.
Base sa pasiunang imbestigasyon ni FO1 Vladimir Macalam nagsugod sa maong sunog sa balay nga gipanag-iya ni Rustico Labajo ug short circuit sa kuryente ang sinugdanan.
Si Sr. Supt. Aloveel Ferrer, regional director sa Bureau of Fire Protection dinhi sa rehiyon nitug-an sa mga tigbalita nga wala na sila’y control sa firetruck sa Tudela sanglit gipanag-iya kini sa local government.
Dugang pa ni Ferrer ang pagdala sa yawe di ilang hurisdiksyon aron imbestigahan kundili ang LGU.
Si Capitol Consultant on information Rory Jon Sepulveda nagkanayon, iyang pa-imbestigahan ang maong hitabo sa nahimong ‘lapses’ sa kapakyas pagresponde sa mga bombero.
Ang hitabo gikasuko ni Tudela Mayor Rogelio Baquerfo tungod sa impormasyong nadawat nga mga sakop sa karibal nga si Mayor Demetrio Granada ang mi-padlock sa maong fire truck.
Si Baquerfo nibasol ngadto sa fire marshall sa maong lungsod kay wala kini nahimo. Dugang pa niya nga gawas niini wala na say ligid ug baterya ang maong firetruck ug gituohang gikawat.
Nagduda si Baquerfo nga nahitabo kini atol sa pag-take over ni Granada sa maong lungsod niadtong nakalabay nga gabii.
Gumikan niini, nagplano si Baquerfo pagpasaka og kaso kang Granada. (Uban sa report ni Chester Abadilla) (BANAT NEWS)