Pulis nga lasbag ug nanghasi taktakon

CEBU – Malagmit mataktak sa trabaho o kaha ma-“demote” ang usa ka pulis nga nanghagis sulod sa ilang headquarter sa miaging semana gumikan sa kalasbag niini.

Matud pa ni Police Superintendent Romeo Perigo, Provincial Deputy Director for Operations sa Cebu Provincial Police Office (CPPO) nga karon pang adlawa hisayri ang silot nga ipahamtang batok kang PO2 Pepito Layague nga nadestino sa lungsod sa Tudela, Isla sa Camotes.

Si Layague giingong puwerting lasbaga niadtong Disyembre 29, 2008 samtang mikobra kini sa iyang P7 mil nga bunos didto sa headquarters sa Cebu Provincial Police Office diin nagpunay kini og hiwasa ug nagsinggit-singgit batok sa mga kahero nga ipadali ang iyang bunos.

Napungot ang duha ka finance officer nga sila si PO1 Menchu Gerognas ug PO1 Hope Goyongco kay dili mahimong unahon nila paghatag sa bunos si Layague kay didto pa kini sa kinaluyohang bahin sa nanaglinya nga kapulisan nga mikobra sa ilang bunos.

Gumikan niini gipadakop nila si Layague ug human kini mamatud-i sa mga doktor sa Cebu City Medical Center nga positibo sa ilimnong makahubog, gibalhog kini didto sa Mabolo Police Station.

Matud pa ni Supt. Perigo nga karong adlawa sugdan na nila ang imbestigasyon batok kang Layague, samtang ang kasong administratiba giandam na usab ni Police Inspector Ruben Cuizon, deputy chief for Provincial Investigation and Detection Management branch (PIDMB) kinsa maoy nagsilbing kihante.

Matud pa ni Perigo nga kuhaan usab nila og apidabit sila si PO1 Gerognas ug PO1 Goyongco aron basihan sa maong imbestigasyon.

Sa sayo pa, daan nang gipahayag nila ni Supt. Perigo ug Inspector Cuizon nga kutob sa mga polis nga magbinuang sa ilang trabaho kinahanglang ipadangat gyud ngadto sa PIDMB aron kini maimbistigar ug kapahamtangan dayon og silot.

Miingon si Perigo ug Cuizon nga dili gusto si Provincial Director Carmelo Valmoria sa mga pulis nga abusador kay mao kini ang maghatag og kadaot ug pagkalusno sa dungog sa kapulisan.

Busa ang kapalaran ni Layague masayran pinaagi sa hukom nga ipakanaog ni Sr. Supt. Valmoria kinsa maoy motimbangtimbang kun taktakon ba o kaha pakupsan sa ranggo ang maong pulis.

Apan matud pa ni Supt. Perigo nga ang kasong administratiba magpadayon bisan kun matangtang na sa trabaho si Layague aron kini ma-leksyon sa dili niya maayong pamatasan nga usa ka dakong kalapasan sa mga lagda ug balaod sa Philippine National Police (PNP) nga giisip nga usa ka “grave misconduct”.

Gibutyag ni Supt. Perigo nga kun mapamatud-an ang maong kalapasan ni Layague, hayan nga mataktak kini sa serbisyo o tibhangan sa ranggo tungod kay idugang pa ning kasoha ang iyang mga kalapasang nahimo sa milabay'ng mga katuigan nga naglakip sa iyang pag-absent without leave (AWOL) ug uban pa. – BANAT NEWS