CEBU – Patay'ng lawas sa bata nga napalgan sa duha ka mananagat sa kalawran sa sitio Sambagan, barangay Tanke niadtong Sabado sa buntag, dili mao ang batang taga Clarin kinsa giingong naanod sa baha.
Kini human usa ka lalaking taga barangay Pasil nga nagpailang amahan sa maong bata mikuha niadtong Sabado sa hapon sa maong patay'ng lawas gikan sa punerarya.
Si Jarlito Laborte, 31-anyos, taga Belgium St., barangay Pasil, dakbayan sa Sugbu mianha sa Saint Francis Funeral Homes sa N. Bacalso Ave. diin gidala ang patay'ng lawas ug iyaha kining giila nga anak.
Si Laborte mibutyag ngadto sa mga polis nga ang maong bata mao si Julo Laborte ,5, kinsa nawagtang sukad pa niadtong Biyernes sa hapon.
Ang kapolisan mipahimangno sa maong amahan nga ipa-eksamin ang maong patay'ng lawas aron masuta kung wala bay foul-play apan nagdumili kini.
Kahinumduman nga ang nahisgutang patay'ng lawas ang gituohang mao si Harold Ramos, 6-anyos, nga naanod sa baha uban sa iyang apohan didto sa Clarin, Bohol niadtong Disyembre 31, 2008.
Usa ka radio station sa Talisay nga gikahinabi sa bise mayor sa nahisgutang lungsod una nang mibutyag nga nitukma ang deskripsyon sa patay'ng lawas sa na-missing nga bata sa ilang lungsod.
Gisuwayan sa Banat News og tawag sa telepono ang disaster action officer sa lungsod sa Clarin nga si Isidro Arcales kabahin sa maong na-missing nga bata apan pakyas ang maong tinguha. – BANAT NEWS