Drug test himuon na pud sa abattoir

CEBU – Laing kinalit nga drug test ang ipahigayon alang sa mga mangingihaw diha sa Cebu City Modern Abattoir (CCMA) sa sayong bahin niining tuiga.

Kini maoy gipahibawo sa labaw sa Department of Veterinary Medicine and Fisheries (DVMF) nga si Alice Utlang kinsa mao usab ang gitahasan pagdumala sa ihawan.

Matud ni Utlang nga ang random drug test sa tanang personnel sa CCMA nahimo nang kabahin sa ilang mga kalihukan matag tuig.

Tumong niini, aron masigurong walay tigamitan og ginadiling drugas sa iyang mga sakop ingon man sa tanang pribadong mangingihaw.

Gitataw ni Utlang nga dili gyud niya tugutan nga makasulod sa ihawan kadtong mga butcher, cleaner ug uban pa nga mapamatud-ang drug users.

“Mao man gyud na ang atong palisiya unya nakahibalo na usab na silang tanan diha sa ihawan nga estrikto gyud ta bahin ana,” sumala ni Utlang.

Ang CCMA duna karoy kapin sa usa ka gatos ka mga mangingihaw diin kasagaran niini giingong mga private butchers. – BANAT NEWS