Polis nangulata'g silingan

CEBU – Usa ka polis nga nadestino sa Cebu City Police Office (CCPO) ang gipasanginlang nangulata sa iyang silingan diha sa basketbolan niadtong Sabado sa hapon sa barangay Candulawan, dakbayan sa Talisay.

Si Rocky Nacorda, 21, residente sa nahisgutang lugar mipasangil ngadto kang PO2 Romualdo Torregoza nga iyang silingan nga gikulata siya niini sa wala matinong rason.

Si Nacorda ang mipasangil usab nga human siya kulata sa maong polis ngadto kaniya gihulga siya niining buk-an sa ulo sa iyang armas. “Wala ka maigo sa sukmag ari ka maigo sa bala buak nang ulo nimo!” sumala pa sa hulga sa maong polis ngadto sa reklamante maong dali siyang misumbong ngadto sa Talisay City Police Station.

Apan si PO2 Torregoza ang nagpa-blotter usab diha sa presinto ug mipasangil kang Nacorda nga miatake ngadto kaniya dihang iyaha kining gibadlong samtang nakig-away sa laing kaduwa.

Matud ni Torregoza nga sa wala pa mahitabo ang insidente nagduwa sila og basketball ug si Nacorda.

Apan si Nacorda ang nagkakita og lalis sa ilang kaduwa nga si Jake Bacalso ug miresulta ngadto sa sinukmagay ug isip polis gibadlong niya ang duha.

Pila ka oras ang milabay si Nacorda ang giingong nakigsinukmagay na usab sa laing kaduwa nga ginganlan og “Donald” ug sa maong hitabo si Torregoza mipatunga na ug miuwang na usab apan giingong nasuko hinuon si Nacorda ug siya maoy gipahimungtan niini ug kalit nga gisukmag. (Brenda Batuto) (BANAT NEWS)