Ginang giluglog sa tulisan

CEBU – Patay na dihang napalgan ug naligo sa kaugalingong dugo ang usa ka babayeng negosyante human gidunggab ug giluglog pa ang liog niini sa wala pa mailhing mamumuno sulod sa iyang balay sa miaging gabii diha sa sitio Fatima sa barangay Cabancalan, dakbayan sa Mandaue.

Ang biktima giilang si Maria Jocelyn Mendoza, 47, tag-iya og tindahan sa maong dapit ug asawa sa usa ka Overseas Filipino Worker (OFW), nadiskubrehan nga nagbuy-od na sa ground floor sulod sa iyang tindahan sa ilang panimalay nga walay kinabuhi.

Anggulo sa pagpanulis ang unang nakitang posibleng motibo sa pagpatay sa maong ginang tungod sa mga nangawagtang nga butang ug salapi niini.

Si PO2 Manolito Raboy sa homicide sa kapolisan sa Mandaue City Police Office (MCPO) miingon nga ang mga kabanay sa biktima maoy nakadiskubre sa patay’ng lawas sa biktima.

Matud pa sa kapolisan ang 8-anyos nga anak nga lalaki sa biktima misugilon nga nakakita kini sa nagbinugtong nga tulisan nga misaka pa sa itaas sa ilang panimalay.

Gikatahong ang maong lalaki nga nagsuot og pang-basketball nga uniporme nga may numerong “5” gikatahong nangukay sa ilang mga butang sa taas, wala hinuon mobutyag ang kapolisan kung diin miadto ug kung unsay gibuhat sa bata atol sa insidente.

Nasayran sa imbestigasyon sa kapolisan nga nangawagtang ang tulo ka mga cellphones sa biktima ug gituuhang may nakuha usab nga wala matinong kantidad sa salapi gikan sa panimalay ang tulisan.

Sumala pa ni Raboy, nanuktok pa sa pultahan ang wala hiilhing tulisan nga giablihan usab sa biktima apan giingong kalit nga mideklarar ang maong tawo og tulis.

Gituuhang mikisi-kisi pa ang biktima maong giluba kini sa tulisan, sumala pa sa mga polis nga dunay unlan diha sa nawong ang biktima nga gituuhang gigamit sa tulisan aron pugngan ang baba niini nga di makasinggit samtang padayong gidunggab ug giluglog ang liog niini hangtud nga namatay.

Ang patay’ng lawas sa biktima naa na sa Rolling Hills sa barangay Banilad sa dalan A. S. Fortuna sa maong dakbayan alang sa autopsy samtang padayon pa ang kapolisan sa pagpangita og impormasyon kabahin sa pagkatawo sa tulisan. – BANAT NEWS