Gordon mag-presidente

CEBU – Andam na si Senate Blue Ribbon Committee Chairman Sen. Richard "Dick" Gordon nga magpresidente sa nasud, hinuon giangkon niyang kini kung ‘swertihon’ siya sa politika.

Kini ang giluwatang pamahayag ni Sen. Gordon atol sa usa ka press conference nga gipahigayon kagahapon sa buntag sa usa ka dakong mall sa North Reclamation Area.

Apan matud pa ni Gordon dili pa angayan nga karong panahona siya modeklarar sa iyang kaugalingon nga modagan pagkapangulo sa nasud sa umaabot nga 2010 gumikan kay daghan pa usab siyang angayang humanon sa iyang termino isip senador ug sa iyang mga komitiba nga gihuptan.

Kung ikumparar sa ubang politikong nagplanong modagan pagkapangulo mas daghan pa siya og eksperyensiya sa pangagamhanan gumikan kay 13 ka tuig na siyang nahimong mayor sa Olongapo City diin kung tan-awon nato karong panahona kini nagmalamboon.

Ang katukoran usab sa Subic Bay sa iya gihapon matawag nga paningkamot ug ang iyang paglingkod isip Senador ug ang iyang pagka-gobernador sa Philippine National Red Cross.

Gumikan niini mipadayag si Gordon nga wala niya sirad-i ang posibilidad nga modagan pagkapangulo sa nasud sa umaabot nga tuig 2010 gumikan kay andam na siya sa maong posisyon. – BANAT NEWS