Mga preso sa City Jail mag-Sinulog

CEBU – Mopahigayon usab og kaugalingong bersyon sa Sinulog Festival ang mga binilanggo diha sa Cebu City Jail niining buwana, sumala pa ni City Jail Warden Superintendent Efren Nemenio nunot usab sa pagpahigayon sa dakbayan sa Sinulog Grand Parade karong Enero 18.

Gitataw hinuon ni Nemenio nga ang ilang Sinulog ipahigayon usa ka semana human sa gipaabot ug gikahinamang Sinulog 2009.

Kini aron ang mga inmates makahigayon pa sa paghuwam sa ubang props ingon man sa mga costumes gikan sa pipila ka participating contingents.

Ang kooperatiba sa mga binilanggo diha sa City Jail giingong maoy nakahuna-huna pagpasiugda og kaugalingong Sinulog contest.

Nagkanayon si Nemenio nga ang contest nagtangag usab og ganting salapi diin ang first prize winner makadawat og P15 mil; P10 mil sa second prize winner ug P5 mil sa ikatulong ganti.

Matud ni Nemenio nga dili usab mabintahaan ang mga grupo nga mosalmot sa contest tungod kay ang ubang sakop niini giingong nakaapil na sa Sinulog Grand Parade.

Giklaro hinoon sa Jail Warden nga dili bukas sa publiko ang pagpahigayon sa Sinulog sa mga binilanggo.

Bugtong gitugutan ni Nemenio nga makasaksi sa ilang Sinulog contest mao lang kadtong mga higala ug pamilya sa mga inmates.

Sa kasamtangan niingon ang Jail Warden nga padayong nagbansay-bansay ang mga binilanggo sa ilang mga dance steps.

Gawas niini giingong nalingaw usab ang ubang mga sakop sa grupo paghimo sa ilang kaugalingong mga props, costumes ug uban pang gikinahanglan sa ilang presentasyon.

Labing minos lima ka grupo sa mga piniriso sa City Jail ang gipaabot nga magtakos sa ilang dance floor atol unya sa kaugalingon nilang Sinulog contest. – BANAT NEWS