Homicide section wala ma-pressure, polis sa RAIDSOTG pasakaan kaso

CEBU – Wala ma-pressure ang mga imbestigador sa Homicide Section sa lakang karon sa mga kadagkuan sa Police Regional Office (PRO-7) nga nihatag og abogado kang PO3 Ken Yngayo, sakop sa Regional Logistics Division kinsa nasikop human sa nahitabong pagpamusil niadtong petsa 31 sa gabii sa niaging tuig diin usa ka tag-iya’g litsonan ang gipusil-patay diha sa sitio NGA, barangay Lahug ning dakbayan.

Kini maoy gipatim-aw ni Sr. Insp. Mario Monilar, ang hepe Homicide Section dihang gikahinabi sa Banat News human si PRO-7 Chief Supt. Ronald Roderos nipahibalo nga gimanduan na niya ang iyang mga staff sa pagpahatag og abogado kang PO3 Yngayo.

Giklaro hinuon ni Roderos atol sa una niyang pamahayag nga wala magpasabot ang paghatag og abogado kang Yngayo nga giduphan na kini sa PNP sanglit di manginlabot ang PNP kung duna gyud kini nahimong salaod.

“No pressures ang amo lang diri trabaho lang walang personalan…wala mi ma pressure bisan among labaw pay nipahibalong hatagan og abogado (Yngayo) kabahin kini sa demokrasya, gawas pa ang usa ka sakop sa PNP intitled og abogado,” sumala pa ni Monilar.

Gipadayag niini nga sa ilang imbestigasyon susihon nila ang mga angulo kun wa bay kalambigitan si Yngayo sa pagpatay kang Methusael Inesola, 39.

Ang mga sakop sa Special Weapons and Tactics (SWAT) sa Cebu City Police Office ug mga police sa Mabolo Police Station nga nakaresponde sa krimen gikuhaan na usab og affidavit labot sa maong kaso.

Dugang pa niini susihon usab ang pamahayag ni Yngayo sa usa ka TV report nga siya maoy nisekreto’g tug-an sa kapulisan nga naa sa sulod sa iyang panimalay ang duha sa tulo ka triggerman nga sila si Diosdado Ortega ug Jackie Trazona nga pulos confidential agents sa Regional Anti-Illegal Drugs Special Operations Task Force (RAIDSOTF-7).

Kuhaan pa usab og pamahayag ang kamaguwangang anak nga babaye sa namatay human usab kini mibutyag sa usa ka news report nga si Yngayo nagpunay’g pangutana ug nangita sa iyang mama kun si kinsa ang kuyog sa wala pa mahitabo ang krimen.

Dugang pa niini nga gusto siya nga tanang mga statement mabutang sa affidavit.

Gitataw niini nga sa pagkakaron gipanday na nila ang kasong murder batok na nila ni Ortega, Trazona ug sa laing nakasibat nga si Yuli Ramas, samtang kasong obstructions of justice/harboring of criminals ug illegal possession of firearms ang ilang ipasaka batok kang Yngayo karong Lunes.

Nasayran nga bangi sa negosyo sa litson maoy usa sa gisubay sa mga imbestigador sa kapulisan tungod sa makadaghan nang higayon nga dunay insidente sa pagpamusil sa maong litsonan ug ang gipasanginlang mao ang kasikbit nilang litsonan, usa sa napatay na sa maong panagribal sa negosyo ang kapuyo ni Merthusael niadtong Disyembre 31, 2007. – BANAT NEWS