CEBU - Naangol ang usa ka batan-ong polis human tigbasa makadaghang higayon sa usa ka taxi driver nga ila untang dakpon mga alas 7 pasado sa gabii niadtong Enero 1 sa Upper Agsungot ning dakbayan sa Sugbu.
Ang maong polis giila nga si PO1 Daryl Velasco sakop sa 2007-Class Utol ug kasamtangang nagpailawom sa Field Training Program ug gidestino sa Talamban Police Station sa Cebu City Police Office.
Nakaangkon og samad tinigbasan sa iyang ulo, nawong, ug sa buko-buko si Velasco sa dihang kalit nga gitigbas ni Noel Ermac alias “Wengweng,” 26, nagpuyo sa nahisgutang lugar, kinsa napatay usab sa mga kaubang polis dihang gipusil sa iyang ulo.
Sa imbestigasyon nila ni SPO2 Rey Cuyos ug mga kaubanan sa Homicide Section usa ka barangay tanod sa nahisgutang dapit nga si Noel Limpag nangayo’g pakitabang sa kapulisan sa Talamban Police Station human gidunggab ni Ermac sa tuong bahin sa lawas.
Sila si PO1 Daryl Velasco, PO1 Eric Deamante, ug PO3 Jumar Visacara daling miresponde sa nahisgutang dapit ug ilang naabtan si Ermac diha sa dalan nga nangihi.
Apan sa dihang nakakita kanila dali kining mikaratel og dagan padulong sa ngitngit nga bahin sa ilang panimalay diin diay gihaya usab ang iyang amahan nga namatay nga si Feliciano Ermac.
Apan sa tantong tuyok-tuyok pagpangita sa mga polis pipila ka gutlo kalit lang mibutho si Ermac nga nagdala sa sundang nga 21 ka pulgadas dayong tigbas ni PO1 Velasco nga wala makabantay hinungdan nga naigo kini.
Ang kauban niining polis nga si PO1 Deamante nga nagbitbit og M16 Rifle pagkakita sa hitabo daling mipusil kang Ermac sa ulo hinungdan usab sa kamatayon sa suspek.
Si PO1 Velasco daling gidala sa Chong Hua Hospital alang sa pag-atiman.
Matud pang Supt. Pablo Labra, deputy director for administration sa CCPO nga legitimate operation ang nahitabo ug giawhag ang mga bagitong polis nga magmatngon sa ilang pagresponde sa mga alarma.
Samtang ang maong polis gihulagway nga naa na sa maayong kahimtang karon sulod sa maong tambalanan. (BANAT NEWS)