Gikan sa buwangan gipaulanan og bala

CEBU - Namatay diha-diha gilayon ang usa ka 42-anyos nga lalaki human kini gipauwanan og bala sa nag-inusarang mamumuno samtang mipauli gikan sa buwangan mga alas 11 pasado sa buntag niadtong petsa uno ning buwana sa sitio Silingan, barangay Cantabaco dakbayan sa Toledo.

Ang biktima giila sa kapulisan nga si Jaime Larong Jr. alias Okdoy taga sitio Dasiga barangay Das sa nahisgutang dakbayan human makaangkon og samad pinusilan sa nagkadaiyang parte sa lawas.

Sa report nila ni SPO1 Romeo Agustines sa Toledo City Police Office nga giduso sa Cebu Provincial Operations Office gikatahong gikan sa bulangan sa Cantabaco ang biktimang si Larong padulong na sa pag-uli sakay sa iyang motorsiklo.

Apan wala damhang may nag-inusarang mamumuno nga nag-atang nang daan sa dalan sa gihitaboan ug sa iyang paglabay kalit siyang gipauwanan og bala hinungdan sa hinanali niining kamatayon.

Human sa pagpamusil daling nisibat ang suspetsado palayo sa nahisgutang dapit apan wala na gyud maabti pa sa mga ni-respondeng police.

Wala pa matumbok sa kapulisan kun unsay tinuuray'ng motibo sa maong pagpamusil, nakuha diha sa crime scene ang siyam ka mga kabhang sa bala sa .45 kalibre ug tulo ka mga slugs niini.   (BANAT NEWS)