Halin sa pabuto nimenus

CEBU - Minus kaayo ang halin sa pabuto sa milabay’ng pagsaulog sa Pasko ug pagsugat sa Bag-ong Tuig segun sa mga mamaligyaay ug manghimoay niini sa dakbayan sa Lapulapu.

Sagad sa bisperas palang sa pagsugat sa Pasko ug Bag-ong Tuig, modagsa gyud ang mamalitay diha sa ilang mga tindahan ug mosaka ang ilang halin.

Apan karong tuiga gamay ra kaayo nanggawas nga mga tawo aron mangumpra ug namalit sa ilang mga firecrackers, usa sa gituuhang hinungdan mao ang pagpunay og uwan-uwan sa maong mga adlaw.

Gitataw usab sa namaligya sa mga firecrackers nga usa usab sa hinungdan sa paghinay sa halin sa pabuto mao ang pagmahal sa presyo sa pabuto tungod usab sa pagsaka sa presyo sa mga sangkap niini.

Si Grace Pongasi, ang tag-iya sa JP fireworks, sa barangay Babag 2, dakbayan sa Lapulapu nagkanayon nga nidoble ang presyo karon sa pabuto itandi sa nakalabay’ng tuig.

Ang pinakagamay sa matang sa ilang produkto nga gibaligya nila sa niaging tuig ug tag-mamiso karon tag dos pesos na.

Matud pa ni Pongasi nga nihit usab kaayo karon ang supply sa pulbura nga maoy numero unong sangkap sa paggama og firecracker tungod sa kahigpit sa kapolisan sa ilang palisiya sa pag-transport niini.

Nasayran nga ang higpit nga pagkontrolar sa pag-transport sa pulbura alang sa paggama og mga eksplosibo kabahin lamang sa pagpatuman sa kapolisan sa ilang programa batok na terorismo.

Hinuon gitataw ni Pongasi nga dili kaayo sila maalkanse sa kahinay sa palit tungod kay puwede pa man kini mabaligya sa mosunod nga bulan kun may mga okasyon sa mga pista sa mga dakbayan ug kalungsuran sa lalawigan sa Sugbu ug ubang mga kasikbit nga probinsiya.    (BANAT NEWS)