Drug pusher giabsuwelto sa korte

CEBU - Giabsuwelto sa korte sa kasong paghupot sa ginadiling drugas ang usa ka 44 anyos nga lalake human mapakyas sa pagpresentar ngadto sa hukmanan sa warrant of arrest ang kapolisan.

 Si Renato Trazona, 44, minyo, taga PC Hills, barangay Apas ning siyudad giabsuwelto ni RTC-7 Branch 13 Judge Meinrado Paredes sa kasong illegal possession of prohibited drugs tungod kay wala mahasubay sa hustong proseso ang pagdakop kaniya sa mga kapolisan.

 Nasayran nga niadtong Septembre 8, 2007 mga ala 1:30 sa hapon nagpahigayon og foot patrol sila si SPO2 Adolfo Morales, ug PO1 Norman Vincent Palomo sa sitio Lawis, barangay Lorega San Miguel ning siyudad.

 Nalabyan niini ang usa ka drug den nga gituohang gipanag-iya ni John Satera ug ila kining gisulod.

 Si Trazano nga didto sa maong lugar niadtong tungora, miingon nga nakit-an sa mga polis nga may usa ka paketi nga shabu ug drug sniffing paraphernilla sa maong dapit, unya gisikop siya.

 Apan giangkon usab sa polis atubangan sa korte nga wala sila makapahigayon og surveillance, walay search warrant sa ilang pagsulod sa balay hinungdan nga gipakawalay bili sa huwes ang maong asunto batok kang Trazona kinsa gipagawas gilayon sa bilanggoan human sa hukom.(Chester Abadilla)   (BANAT NEWS)