CEBU - Ang Cebu partikular na ang Metro Cebu diin mahimutang ang Cebu City, Mandaue City, Lapulapu City gihimutangan sa mga dagkong negosyo, bangko, ug uban pang financial institutions.
Gumikan niini humot kaayo kining target sa mga dagkong sindikato sa mga tulisan nga nagbase gikan pa sa kaulohan ug sa Mindanao maong bisan pa man sa higpit nga pagpaniid ug pag-deploy og daghang polis sa kadalanan wala gihapon kini hingpit mapugngi.
Atong lakbitan ang pipila niining mga pagpanulis dinhi sa Sugbu, usa niini ang gihulagway nga labing kulba kaayong gihimo sa mga tulisan diha sa duha ka pawnshops sa dalan Magallanes Street sa barangay Ermita diin usa ka sibilyan ang patay.
Susama sa salidang “Heat” nga gibituonan ni Val Kelmer, Al Pacino ug Robert De Niro niadtong dekada 90, kargado og tag-as nga kalibre sa armas ang gibana-banang lima ngadto sa walo ka mga tulisan dihang ilang gisulod ang Ahensya Ann ug Oro Sugbu nga gipang-iya sa magsuong Robert Siguan ug Ernesto Siguan.
Mokabat sa gibana-banang P13 milyones nga mga alahas nasakiyo sa mga tulisan nga nigamit og maso pagbuak sa mga estanteng gibutangan sa mga baligyang alahas.
Swerteng may usa ka undercover nga polis nga diha sa dapit ug nakigpinusilay sa mga tulisan ug usa sa mga suspek ang gituuhang naigo base sa dugo nga naa sa getaway van nga gibilin sa dalan Tres de Abril.
Usa ka Remegio Dungog, residente sa Lapu-Lapu City ug trabahante sa opisina ni Mayor Arturo Radaza nga naigo sa dughan sa pagpangrakrak ang namatay sa Cebu City Medical Center, ug usa ka Ronilo Dadol, 35, nga namaligya og ukay-ukay naangol usab.
Duha ka gidudahang kauban sa grupo ang nasikop sa hot pursuit operation diha sa dalan B. Aranas Street sulod sa Cres Pension nga giilang si Emmanuel Alimbuyong Caraballo,33, taga sitio Pungtod, barangay Sto. Niño, San Agustin, Surigao del Sur ug Baby Toring, sa Alumnus-Mambaling.
Sila si Caraballo ug Toring positibong giila sa mga saksi ingon man sa Security Guard nga si Lorenzo Buan maong sila gipasakaan og kasong robbery with homicide and physical injuries.
Ang duha pulos mi-deny nga kabahin sa maong grupo sa tulisan.
Laing pagpanulis usab nahitabo diha sa LBC Hari ng Padala sa usa ka mall sa barangay Banilad ning dakbayan sa Sugbu nga miresulta dayon sa pagkasikop sa usa sa mga suspetsado nga si Rico Bontuyan, 30, diha sa sitio Dita barangay Pulangbato ning dakbayan.
Apan sahi sa uban, walay bisan usa ka armas nga gipakita ang mga suspek bugtong hulga ra ang ilang gigamit aron makuha ang salaping P90 mil.
Ang cashier mga saksi nga sila si Giecen Mae Obsioma ug Mary Caryn Nasataya, positibong niila kang Bontuyan nga maoy nikuha sa kwarta ingon man mihinol kanila.
Laing makunsiderar nga kulba kaayong pagpanulis nahitabo sa Golden Treasures, Best of Jewelry niadtong unang semana sa bulan sa Nobiyembre sa ikatulong andana sa Mango Square Mall.
Siyam ka mga tulisang armado og Baby Armalite ug uban pang tag-as nga kalibre sa armas nisakiyo sa mokabat kapin sa usa ka milyon nga mga mahalong alahas.
Pulos wala makaarte ang mga guwardiya dihang gipangtiunan sa mga suspek sa ilang mga armas atol na sa ilang pag-ikyas sakay sa usa ka awto.
Hinuon usa ka semana ang milabay nakapasaka og kaso ang mga polis human madakpi ang usa sa mga tulisan ug kini mao si Isidro Manlangit Sr. nga positibong gitudlo sa nakasaksi sa tulis nga usa sa mga mitulis kanila, kini mihimakak hinuon sa pasangil.
Laing napasakaan og kaso mao sila si Alicando Calong, Danny Masicampo ug laing upat ka wala mailhing lalaki nga pulos wala pa madakpi.
Si Sr. Supt. Patrocinio Comendador, director sa Cebu City Police Office miingon nga estilo sa Mindanao robbery groups ang pagpamuak sa mga estante.
Sa dakbayan sa Lapulapu, gitulis ang van sa Cebuana Lhuillier sa tiilan sa Marcelo Fernan Bridge ug nadala ang P1 milyong cash ug alahas.
Si Sr. Supt. Louie Oppus, kanhi director sa Lapulapu City Police Office nimando nga ipailawom sa lie detector test ang mga kawaning nagdala sa maong salapi.
Mipagawas na sa cartographic sketch sa usa sa lima ka mga tulisan nga gibana-banang 35 ngadto sa 45 anyos, 5’6 ang gitas-on, tambukon ug nagsuot og camouflage ug t-shirt nga may ‘police markings.’
Matud pa sa mga saksi nga daw sundalo o polis ang linihukan sa mga tulisan nga armado og Armalite Rifle ug M203 grenade launcher.
Laing insidente mao ang pagtulis nga nalutsan usab ang kapulisan sa dakbayan sa Lapulapu sa duha ka tulisan nga nag-uniporme og ‘police interns’ mitulis sa Mactan Rural Bank diha sa sitio Iba, barangay Basak ug gisakiyo ang P1.5 million cash sa teller ug sa vault.
Gawas niining maong mga insidente duna pay laing pagpanulis nga nanghitabo sa bangko sa Carcar, sa mga gasoline stations ug tindahan sa susamang tuig. (Guamittos Logroño) (BANAT NEWS)