'Prosti' nga mga bayot midaghan

CEBU - Mga mahuyang nga magbaligya sa ilang mga dungog maoy usa sa mga problema karon diha sa barangay Camputhaw panahon sa kagabhion hangtud na sa kaadlawon diha sa may eskina Escario ug Gorordo sa nahisgutang lugar.

Si Konsehal Jeffrey Tumulak kinsa maoy tsirman sa Peace and Order Committee sa barangay nga nahinabi sa Banat News miangkon nga nagproblema gyud sila sa pagpuhag sa maong mga mahuyang nga magtapok sa nahisgutang eskina panahon sa kagabhion ingon man kaadlawon.

Gibutyag niini nga mo-sobra sa 50 ka mga mahuyang ang moladlad sa nahisgutang dapit nga mamara’g mga sakyanan, giingong sagad sa mga kustomers mga langyaw.

Nunot niini ang komitiba ni Tumulak moduol ngadto ni Rene Joseph Bullecer, ang tsirman sa Cebu Anti-Indecency Board sa dakbayan labot na niini.

Dako ang ilang pagtuo nga kasagaran sa maong mga mahuyang dili gyud taga barangay Camputhaw apan anha lang gyud magyampungad sa nahisgutang dapit.

Gisusi usab nila karon kung duna bay mga agalon ang maong pundok tungod kay nagtuo si Tumulak nga gibugaw kini.

Gawas pa nga makahatag kini’g bating imahen sa ilang barangay kuyaw usab kaayo nga daghang matakdan sa sakit nga Acquired Immune Deficiency Syndrome(AIDS) ug uban pang sexually transmitted diseases(STDs) diha sa ilang lugar.

Gibutyag niini nga niadtong mga milabay’ng bulan dunay usa ka security guard ang nagpaum-om sa iyang kinatawo sa usa ka mahuyang daplin mismo sa dalan hinungdan nga gidakop sa mga barangay tanod. (Guam Logroño)   (BANAT NEWS)