Budol, mangunguot ug kawatan panid-an

CEBU - Gisugdan na karon sa Cebu City Police Office (CCPO) ang pag-monitor sa mga grupo sa mga mangunguot, manimpuhay, tulisan ug mangingilad gikan sa nagkalain-laing dapit nga mangabot dinhi sa dakbayan sa Sugbu nga mangigo atol sa kasaulogan sa Sinulog 2009.

Si Sr. Insp. Michael Anthony Bastes, hepe sa Theft and Robbery Section sa CCPO nitug-an sa mga tigbalita nga nakig-alayon na sila karon sa mga tag-iya og boarding houses ug ingon man pension houses dinhi sa dakbayan nga posibleng maoy abtan sa maong mga tawo.

Lakip sa mga grupong gipanid-an ug gituuhang manganhi sa Sugbu aron mamiktima naggikan sa Ormoc City, Ozamis ug Davao sa una pa lang semana sa buwan sa Enero.

Midugang si Bastes, sa liwas sa Bag-ong Tuig ang grupo nga may nagkadaiyang modus operandi sama sa panguot, “laglag barya,” ug “budol” gipaabot nga adto una mo-operate sa kaulohan alang sa tinuig nga kapistahan sa Black Nazarene sa Quiapo, Manila.

Nasayran nga liboan ka mga deboto sa Black Nazarene matag tuig gikan sa nagkalain-laing dapit sa nasud tuyong mobisita didto sa maong lugar.

Human didto mobalhin sila nganhi sa Sugbu, mao nga moselebrar usab sa Sinulog pahinungod kang Senior Sto. Niño diin libo-an usab nga mga deboto ang mangabot dinhi.

Nunot niini, si Bastes miawhag sa publiko ilabi na sa mga tag-iya og boarding houses ug pension houses nga mo-report gilayon sa ilang buhatan kun ugaling dunay grupo sa mga tawo nga moabang og kuwarto ug kadudahan ang linihukan.

Kahinumduman, sa milabay’ng Sinulog unom ka mga notadong mangunguot nga taga Davao ug Ozamis City ang nangadakpan sa grupo ni Bastes nga nag-abang og kuwarto sa usa ka pension house diha sa may Capitol Site ning dakbayan.

Gani nasakmitan ang maong grupo og ubay-ubay nga mga mahalong cellphone, shades, pitaka ug uban pa nga ilang nakuot sa mga tawo nga mitan-aw atol sa Sinulog diha sa may Fuente Oval ug dalan Mango Avenue.

Busa giawhag usab ni Bastes ang katawhan nga magmabinantayon atol sa Sinulog ug likayan ang pagdala og mahalong mga alahas.

Gisugdan na sa CCPO ang pagpakatap sa mga polis diha sa kadalanan dili lang alang sa pagsugat sa Bag-ong Tuig kundili hangtud na unya sa Sinulog.   (BANAT NEWS)