2 tulisan pormal nakiha

Napasakaan na og kaso sa korte ang duha ka gipasanginlang mga tulisan nga nagmotorsiklo ug nasikop sa kapolisan sa siyudad sa Sugbu sa usa ka checkpoint sa dalan F. Cabahug, Panagdait, barangay Kasambagan.

 Ang napasakaan og kasong paghupot og armas ug ingon man mahait nga hinagiban mao sila si Richard Ortega ug usa ka Joseph Ababa, kinsa nakuhaan og .357 rebolber ug usa ka kutsilyo.

 Niadtong Nobiyembre 29, nadakpan ang duha sa police checkpoint sa Task Force Motorista sa nahisgutang dalan apan dihang nabantayan ang mga police daling mibalik sa agi apan nasugatan hinuon nila ang laing grupo sa mga polis nga gituyo og paatang sa unahan.

Si City Prosecutor Nicolas Sellon, nihatag og igong panahon ngadto sa duha ka akusado kinsa giabagan sa PAO lawyer sa pagsumiti sa ilang counter affidavit apan napakyas sila hinungdan nga hingpit na nga gisang-at ang kaso sa korte.

 Si Piskal Sellon nirekomendar og P30 mil   nga piyansa alang sa temporaryong kagawasan alang sa mga akusado.