Gipatay atubangan sa 2 ka anak

Gidunggab sa makadaghang higayon hangtod nga namatay atubangan sa iyang 6 anyos ug 7 anyos nga mga anak ang usa ka ginang nga negosyante didto sa barangay Sangi, siyudad sa Toledo sa may alas 10 niadtong miaging gabii.

Ang biktima nga naputos og samad dinunggaban ang tibuok kalawasan mao si Alma Alegarbes Alecante, 37, minyo, usa ka negosyante og carenderia ug videokehan nga nagpuyo sa Doplex compound Atlas Fertilizer barangay Daan-Lungsod   sa nahisgutang siyudad.

Matud ni PO2 Roel Suquib sa Toledo City Police Station sa dihang nahinabi sa Banat News subay sa blotter nga gibasehan niini ang biktima kauban sa iyang duha ka mga anak lalaki nga nagpangidaron og 6 ug 7 anyos migawas sa ilang pinuy-anan aron sa pagpamalit og pan sa usa ka bakery.

Apan sa ilang pagpauli gisugat kini sa lalaki   nga gihulagway lang nga nagsul-ob og kolor pula nga senina ug kolor puti nga short ug nakasul-ob og kawo nga stripe sa ilang pagkanaug sa traysikol.

Mitumaw ang panaglalis sa biktima ug sa lalaki ug miresulta sa pagpanunggab ngadto sa biktima nga nasaksihan sa pipila ka mga saksi ug sa duha ka mga bata nga nagsigi og panagang ang biktima hangtod nga natumba sa daplin sa karsada tungod sa daghang mga samad nga naangkon.

Ang biktima nakaangkon og samad dinunggaban sa iyang tiyan, dughan ug daghang samad usab sa iyang duha ka bukton nga gituohang resulta sa iyang pagpunay og panagang.Ang mamumuno nakit-an sa mga saksi nga yano ra kaayo nga misibat pahilayo biniyaan ang biktima nga nagbuy-od daplin sa karsada nga nagkadugo samtang nag-atang ang duha ka mga anak niini nga nagpunay og hilak.

Matud ni PO2 Suquib padayon pa ang ilang imbestigasyon pagtumbok sa mamumuno ug sa motibo sa krimen sukad kagahapon ug nakasugat sila og gamay'ng kalisdanan ilabi na kay ang pipila ka mga nakasaksi wala gyud makaila sa nagpatay sa biktima.