CEBU - Nasiak ang ulo sa usa ka 22-anyos nga katabang human gitigbas sa usa sa tulo ka tulisan nga misuway unta niya’g lugos niadtong Domingo sa kaadlawon diha sa sitio Menteryong Daan-lungsod sa Balamban.
Nakaangkon og dili mominos napulo ka tahi sa iyang ulo ang katabang nga si Jonalyn, apelyido gipugngan, samtang ang kauban niining katabang nga si Geraldine Catao, 19, nakalingkawas human napupusan sa plastic tube.
Apan ang anak sa ilang amo nga si Liza Amante, mihubag ang tuong bahin sa kamot human usab gihapsan og bato.
Samtang ang nadakpang tulisan giila nga si Julito Dayanan, 18, taga barangay Gaas, ug duha ka kauban niining nakaikyas nga 17-anyos, taga Gaas ug kanhi katabang sa pamilya ug laing wala mailhing kauban.
Si PO3 Julius Obaña sa Balamban Police Station nga gikahinabi sa Banat News nagkanayon nga mga alas 10 kapin ug kulang niadtong Sabado sa gabii nakasulod sa panimalay sa mga Amante nga daplin ra sa dagat.
Apan nianang pagka-Domingo na sa kaadlawon nisulod na sa mga lawak nila ni Liza Amante ug katabang nga si Jonalyn.
Matud pa niini nga nakamata sila si Amante sa pagpunay og paghot sa iro niadtong gabhiuna apan wala sila magdahom nga mga tulisan na diay ang nakasulod sa panimalay.
Gikatahong gisulod sa mga tulisan ang lawak ni Amante ingon man Jonalyn ang duha giliab ug gisampungan sa baba.
Apan si Jonalyn nga gihulagway nga maanyag gisuwayan unta og lugos sa 17-anyos nga tulisang kanhi katabang apan nisukol ang dalaga hinungdan nga gitigbas kini sa ulo.
Hinuon ang laing katabang nga si Geraldine nga nakabantay daling nakasinggit hinungdan nga nangmata ang mga silingan ug nahitabo ang ginukdanay.
“Nagtuo mi nga dili lang tulis ang tuyo sa tulo apil na ang pagpanglugos pulos ni maanyag nga mga katabang…si Jonalyn gwapa bataa..unya nisukol man gitigbas nalang,” sumala pa ni PO3 Obañana.
Matud pa nga dihang nabulabog ang tulo ka tulisan nanglayat sila sa dagat apan ang 17-anyos nadakpan. (BANAT NEWS)