YEARENDER: Pagbuak sa Sugbu wala mosaler

CEBU - Makadaghan nang higayon nga gihulga ang probinsiya sa Sugbu nga buak-buakon pinaagi sa pagmugna og laing probinsiya apan wala kini nilampos kay ang katawhan ug mga opisyal sa kagamhanan sa siyudad ug sa probinsya nagkahiusa.

 Apan niining tuiga sama ra nga nasiak ang Sugbu sa panagbangi ni Cebu City Mayor Tomas Osmeña ug ni Governor Gwendolyn Garcia.

 Nagsugod ang aslum nga relasyon tali ni Osmeña ug Garcia dihang gibaraw sa mayor ang Land Swap Deal tali sa probinsiya ug sa siyudad.

Ang maong kasabutan naglatid nga kabahin sa pipila ka hektarya nga yuta sa North Reclamation Area sa siyudad ang ihatag sa probinsiya bugti sa paghatag sa lote sa Ordinance 93-1 sa probinsiya nga anaa sa nagkadaiyang barangay sa dakbayan nga giukopahan sa mga konstituwente sa siyudad.

 Si Osmeña niingon nga alkanse ang siyudad kay sama og nidawat og limpyo ang probinsiya kay daghan man og asikasuhon una pa hingpit nga madawat ang lote ubos sa 93-1 ngadto sa mga okupante.

 Tungod niini, niulbo ang panagsungi sa duha ug nagsugod ang “word war” tali ni Osmeña ug Garcia.

 Niining tuiga, ang sikat kaayo nga “dancing prisoners” sa Cebu Provincial Detention and Rehabilitation Center kon CPDRC wala paapila sa Sinulog Mardi Gras kay kuyaw nga makamugna og kagubot.

 Wala pa makontento ang siyudad, gidid-an pa ang tanang mga infrastructural developments sa barangay Banilad diin nahimutang ang minilyon nga Ciudad Project sa probinsiya.

Tungod kay matud pa sa mayor pagatukoron ang Banilad-Talamban Flyover project ni North District Congressman Raul Del Mar, apan dihang nahuman na kini wala gihapon hatagi og permiso sa mayor aron makasugod ang proyekto sa probinsya.

Nagdumili usab sa paghatag og building permit ang mayor sa pagtukod og Headquarter sa Cebu Provincial Police Office diha sa may Sudlon I ning dakbayan sa Sugbu.

Agi og balos, si Garcia nipahibawo sa kagamhanan sa siyudad nga ilang bawion ang lote nga iya sa probinsiya nga giukopahan karon sa Cebu City Police Office lakip na usab ang lote sa Cebu Zoo nga nahimutang sa Beverly Hills, Lahug, ning siyudad sa Sugbu.

Niining bag-o lang, ang Kapitolyo nanghilabot sa pagpabaligya sa siyudad sa Sugbu sa luna sa South Road Properties kun SRP. Human nanghambog si Osmeña nga ang Filinvest Land Inc. mopalit og 50 ka hektarya nga luna sa SRP, ang Kapitolyo nitumbok nga moapil usab sila sa bidding sa lote nga palitunon sa Filinvest Land Inc.

Ang pagsalga sa probinsiya sa biddings sa SRP maoy nakalangay usab sa pagkahalin sa lote sa SRP nga sulod sa dugay nga panahon wala pa gyud kahalini.

Sa grabeng panagsungi sa gobernador ug sa mayor, unang nibigay ang kahimtang sa panlawas ni Osmeña kinsa tua karon sa Boston, Texas, Estados Unidos kay nagpatambal sa iyang cancer sa urinary bladder.

Kun naglisod ang kagamhanan sa lalawigan sa pagpatuman sa ilang mga proyekto, naglisod usab ang kagamhanan sa siyudad sa pag-irog sa  major investments ilabina sa SRP tungod sa giingong politikanhon ug personal nga panagsungi ni Cebu city mayor Tomas Osmeña ug ni Governor Gwendolyn Garcia. (Chester Abadilla) (BANAT NEWS)