CEBU – Gipasalig ni Bise Mayor Carlo Fortuna nga paluyohan niya ang mga programa sa administrasyon ni Mayor Jonas Cortes nga gitumong alang sa kalamboan ug kaayohan sa mga Mandauehanon.
Si Fortuna nga nakighiusa kang Mayor Cortes sa pagtambong sa Christmas party sa mga kawani sa city hall niadtong Sabado nagkanayon nga may dugang gahin nga salapi nga giandam alang sa mga proyekto sa tuig 2009 nga giaprobahanan na sa konseho.
Matud pa ni Fortuna nga ang pag-usbaw sa tinuig nga kitaong salapi sa dakbayan maoy nagpakita sa dakong pagsalig sa mga magpapatigayon sa kasamtangang administrasyon.
Dugang pa niya kutob sa nahibilin nga pundong salapi ilang paningkamutan nga ikagahin alang sa mga panginahanglan sa serbisyo ug kalamboan sa dakbayan.
Si Mayor Cortes sa iyang reaksiyon mipadayag usab sa iyang kahinangop sa mga suporta karon nga gipakita ni Bise Mayor Fortuna sanglit alang kaniya, ang panaghiusa sa mga opisyal maoy makahatag og positibong kaugmaran sa dakbayan.
Busa sa iyang kahinangop nagpasalamat siya kang Bise Mayor Fortuna tungod sa gipadayag niining suporta sa iyang mga programa uban ang paggahin og igong salapi alang sa kalamposan ning tanan.
Naglakip sa mga gi-aprobahan sa konseho mao ang gahin nga alang sa mga benepisyo sa mga regular, casual ug program nga mga kawani sa dakbayan sa Mandaue.
“Akong ipasalig sa atong dakbayan ug sa atong mayor nga ang atong serbisyo dili nato ikompromiso,” nagkanayon si Fortuna sa iyang pamahayag.
Dugang pa ni Fortuna nga kining Paskoha usa ka halandumon sanglit gawas sa daghang sugang dagitabnon sa kadalanan, daghan usab ang mga gasa nga gihatag gikan sa Labaw nga Makagagahom, alang sa dakbayan sa Mandaue, matud pa niya. –BANAT NEWS