CEBU – Natagbaw si acting Vice Mayor Hilario Davide III sa performance sa iyang mga kauban sa konseho sa dakbayan.
Kini bisan pa man sa kamatuuran nga dunay pipila ka mga konsehal sa siyudad nga nanginahanglan pa og giya sa ilang pagpangatungdanan.
Gani dunay mga tigpaniid sa City Hall ang nakasaway sa maong mga konsehal tungod kay dili moapil sa bisan unsang deliberasyon atol sa ilang sesyon.
Apan matud ni Davide nga ang mga sakop sa konseho naninguha sa tagsa-tagsa nila ka kaugalingon pagtrabaho sa ilang gimbuhaton.
“Personally, I think everyone is trying his or her best to do or perform their job, to initiate sa ilang mga pet projects,” nagkanayon ang acting vice mayor.
Nidugang si Davide nga maayo usab ang gipakitang kooperasyon sa iyang mga kauban sukad sa iyang pag-asumir sa bag-ong katungdanan isip presiding officer sa City Council.
Giangkon hinuon sa acting vice mayor nga duna pay dakong luna ang kalambuan sa pag-alagad sa tagsa-tagsa ka opisyal sa siyudad.
“There’s always room for improvement, in fact, one of my New Year’s resolution is to become a better government worker,” dugang pamahayag ni Davide.
Gipasalig sa acting vice mayor nga sa sunod tuig, ilang ipadayon ang paghatag og pagtagad sa nag-unang mga panginahanglan sa dakbayan.
Partikular na niini ang mga batakang serbisyo nga naglakip sa health and sanitation, peace and order ug uban pa.
Napanglantawan ni Davide nga mas molambo pa ang basic services sa siyudad sunod tuig taliwala sa gikabalak-an sa uban nga global financial crisis.
Kini tungod kay gipaabot sa acting vice mayor nga mahalinan na ang dakbayan sa South Road Properties (SRP). –BANAT NEWS